Washi News : एपीएमसी बाजारात स्ट्रॉबेरीचा हंगाम सुरू झाला आहे. हंगामाच्या सुरुवातीला आवक कमी असल्याने घाऊक आणि किरकोळ बाजारात स्ट्रॉबेरी चांगलाच भाव खात आहे.

आंबट-गोड चवीच्या स्ट्रॉबेरीला घाऊक बाजारात प्रतिकिलो ४५० रुपये भाव मिळत असून ६० रुपयांना १०० ग्रॅमचा वाटाही किरकोळ बाजारात मिळत आहे. भाव चांगला मिळत असल्यामुळे शेतकऱ्यांसह व्यापारीही सुखावले आहेत.

बाजारात साधारण नोव्हेंबरपासून स्ट्रॉबेरीची आवक होण्यास सुरुवात होते. दिवाळीनंतर वातावरणात गारवा जाणवू लागला असतानाच बाजारात लालचुटुक, आंबट-गोड अशी स्ट्रॉबेरी दाखल होण्यास सुरुवात झाली आहे. वाशीतील एपीएमसी फळ बाजारात शुक्रवारी ११४ क्विंटल स्ट्रॉबेरीची आवक झाली.

ही आवक सध्या किरकोळ असल्याचे व्यापारी सांगतात. जानेवारी ते फेब्रुवारीपर्यंत मोठ्या प्रमाणात आवक होण्याचा अंदाज व्यापाऱ्यांनी वर्तवला आहे. यंदा स्ट्रॉबेरीचे उत्पादन चांगले झाल्याने मालाला चांगला भाव मिळण्याची शक्यता शेतकऱ्यांनी व्यक्त केली आहे.

सध्या घाऊक बाजारात आकारमान आणि गुणवत्तेनुसार स्ट्रॉबेरीला ३५० ते ४५० प्रतिकिलो इतका भाव मिळत आहे; तर किरकोळ बाजारात ४५० ते ६०० रुपये किलोने स्ट्रॉबेरी विकली जात आहे. त्याचप्रमाणे ६० रुपये १०० ग्रॅमचा वाटादेखील विक्रीस उपलब्ध आहे.

त्यामुळे हंगामाच्या सुरुवातीला स्ट्रॉबेरी उत्पादकांना याचा फायदा मिळण्याची शक्यता आहे. महाराष्ट्रात सातारा जिल्ह्यातील महाबळेश्‍वर, पाचगणी, वाई ही स्ट्रॉबेरी उत्पादनाची मुख्य केंद्रे मानली जातात. नाशिकच्या शेतकऱ्यांचाही प्रयोग यशस्वी केल्याने उत्पादन वाढण्यास मदत झाली.