Pune News: उन्हाळ्यात प्रवाशांची गरज लक्षात घेऊन राज्य परिवहन महामंडळाच्या (एसटी) पुणे विभागात ४० नवीन एसटी बस दाखल झाल्या आहेत. त्यामध्ये स्वारगेट, शिवाजीनगर, इंदापूर आणि बारामती या आगारांना प्रत्येकी दहा बस देण्यात आल्या असून, प्रवाशांसह एसटी प्रशासनाला काहीसा दिलासा मिळाला आहे.

पुणे एसटी विभागातून प्रवास करणाऱ्यांची संख्या मोठ्या प्रमाणात आहे. त्या तुलनेत बसची संख्या कमी होती, त्यात काही बस जुन्या झाल्यामुळे त्या वारंवार बंद पडत असून, काही बस स्क्रॅप करण्याशिवाय पर्याय उरलेला नाही. त्यामुळे एसटी प्रशासनाच्या बसच्या वेळा आणि संचलनाचे नियोजन करताना चांगलीच तारेवरची कसरत होते. मार्च महिन्याच्या सुरुवातीला पुणे विभागातील एसटीच्या ताफ्यात २० बस दाखल झाल्या आहेत, तर आणखीन ४० बस (लालपरी) दाखल झाल्याने एसटी प्रशासनाने समाधानाचा सुस्कारा सोडला आहे.

बसची संख्या वाढल्याने प्रवाशांना त्याचा नक्कीच फायदा होणार आहे. मागील काही दिवसांपासून एसटीचा उन्हाळी हंगाम सुरू झाला आहे. अशा परिस्थितीत प्रवाशांची वाढती संख्या आणि जुन्या एसटी स्क्रॅप होण्याचे वाढते प्रमाण पाहता, अजून किमान १०० नवीन बस तरी पुणे एसटीच्या ताफ्यात येणे अपेक्षित आहे. जेणेकरून वाढत्या गर्दीला सुरक्षित आणि वेळेत बससेवा देता येईल.

दरम्यान, पुढील काही दिवसांत विभागातील सर्व आगारांत नव्या बस दाखल होणार आहेत. त्यामुळे पुणे एसटी विभागातील बसची संख्या वाढणार असून, जुन्या बसमुळे प्रवाशांना होणारा त्रास कमी होणार आहे, असे एसटी प्रशासनाकडून सांगण्यात आले.

पुणे विभागाला २१५ गाड्यांचा निर्णय

पुणे एसटी विभागातून पूर्वी ५० ते ६० हजार प्रवासी प्रवास करत होते. त्यामध्ये ३० ते ४० हजार प्रवाशांची वाढ झाली आहे. महिला सन्मान योजना, अमृत ज्येष्ठ नागरिक योजनांमुळे एसटीची प्रवासी संख्या मोठ्या प्रमाणात वाढली आहे. पुणे विभागाला नव्या २१५ गाड्या पुणे विभागाला देण्याचा निर्णय घेतला आहे. मात्र, त्या टप्प्याटप्प्याने दाखल होत असून, उन्हाळी हंगाम सुरू होण्याआधी बस दाखल झाल्या, तर प्रवाशांना त्याचा फायदा होईल.