Agriculture News : महात्मा जोतिबा फुले शेतकरी कर्जमुक्ती योजने अंतर्गत प्रोत्साहनपर योजनेसाठी अर्ज केलेले ३२ हजार ४८८ शेतकरी अपात्र ठरले आहेत. याची यादी प्रसिद्ध केली आहे.

पात्र १० हजार २३६ शेतकऱ्यांना अद्यापही प्रोत्साहनात्मक रक्कम मिळालेली नाही. त्यांना निधी मिळताच ही रक्कम दिली जाणार असल्याची माहिती जिल्हा उपनिबंधक निलकंठ करे यांना प्रसिद्धीपत्रकाद्वारे दिली आहे.

पत्रकात म्हटले आहे, जिल्ह्यीतल नियमित कर्ज परतफेड करणाऱ्या ३ लाख ९४४ कर्जखात्याची माहिती पोर्टलवर भरण्यात आली. त्यापैकी अपलोड केलेल्या कर्जखात्यापैकी १ लाख ८९ हजार ३५८ इतक्या कर्जखातेदारांना पोर्टलवरुन विशिष्ट ओळख क्रमांक मिळाला. त्यापैकी १ लाख ८७ हजार ६२२ कर्ज खातेधारकांनी आधार प्रमाणिकरण केले.

प्रमाणीकरण केलेल्या कर्जखातेधारकापैकी १ लाख ७७ हजार ३५९ कर्जखातेधारकांना ६४४ कोटी ६९ लाख रुपये प्रोत्साहनपर सानुग्रह अनुदानाचा प्रत्यक्ष लाभ दिला. उर्वरित १० हजार २६३ कर्जखाते धारकांचे आधार प्रमाणिकरण करुनही प्रोत्साहनपर सानुग्रह अनुदान मिळाले नाही. त्यांना निधी आल्यानंतर ही रक्कम दिली जाणार आहे.

हे झाले अपात्र

जे शेतकरी कर भरतात, शासकीय अधिकारी किंवा कर्मचारी आहेत. शेती व्यतिरिक्त इतर व्यवसाय करतात, निवृत्तीवेतन सुरू आहे, अनुदानित संस्थेचे कामगार आहेत, सहकारी बँकांमध्ये कर्मचारी असून ज्यांचे उत्पन्न २५ हजारपेक्षा जास्त आहे अशा लोकांना या योजनेतून अपात्र केले आहे.