Solapur News : मंगळवेढा महसूल विभागात वेगवेगळ्या पदांवरील ३१ कर्मचाऱ्यांच्या जागा रिक्त आहेत. त्यामुळे तालुक्याच्या महसूल विभागातील कर्मचाऱ्यांवर नागरिकांना सेवा देताना ताण जाणवत आहे.

तहसीलदार हा तालुका महसूल प्रशासन व्यवस्थेचा केंद्रबिंदू असतो. महसूल विभागात जमिनीशी संबंधित कामे, करसंबंधित कामे, समस्यांचे निवारण, नैसर्गिक आपत्तीशी संबंधित नुकसान, दस्तऐवज संबंधित कामे, भूसंपादन प्रकरणे आदी विविध प्रकारची कामे असतात.

महसूल विभागातील रिक्त पदांमुळे नागरिकांची कामे वेळेवर होत नाहीत. एका कामासाठी दहा हेलपाटे मारावे लागत आहेत. त्यामुळे नागरिकांना मन:स्ताप सहन करावा लागत आहे. तालुक्याच्या शेती चक्राचा बोजा वाहणाऱ्या महसूल प्रशासनातील कर्मचाऱ्यांची भरती लवकरात लवकर व्हावी, अशी नागरिकांची मागणी आहे.

तलाठ्यांच्या रिक्त जागा अधिक

मंगळवेढा महसूल विभागात ८१ गावे आहेत. या ८१ गावांसाठी तलाठ्यांच्या ४६ जागा मंजूर आहेत. त्यापैकी ३३ जागांवर तलाठी आहेत तर १३ जागांवर पदे रिक्त आहेत. ग्रामीण भागाच्या नोंदवह्या अद्ययावत ठेवणे,

दैनंदिन कार्यावर लक्ष ठेवणे, गावकऱ्यांच्या समस्या जाणून घेऊन शासन व जनता यांमधील दुव्याचे काम करणे या कामांसह शासनाचा गाव पातळीवरील मूलभूत घटक म्हणून सरकार तलाठ्याला विविध परिपत्रके, शासन निर्णय, स्थायी आदेश किंवा सूचना देत असते.

नैसर्गिक आपत्तीची माहिती मंडल अधिकारी व तहसीलदारास देणे, गावातील जमिनींचा आणि पिकांचा हिशेब ठेवणारा हिशेबनीस म्हणून तलाठ्याकडे पाहिले जाते. गावातील इंचन्इंच जमिनीच्या तसेच जलस्रोतांच्या नोंदी ठेवणे हे तलाठीपदाचे मुख्य काम आहे.

पण तलाठी पदांच्या अपुऱ्या संख्येमुळे कामावर असणाऱ्या तलाठ्यांवर त्या अतिरिक्त कामांचा ताण येतोय व त्याचा परिणाम कामावर दिसून येत आहे.

अशा आहेत रिक्त जागा

नायब तहसीलदार : एक, अकाउंटंट : एक, महसूल सहायक : सहा, तलाठी : १३, वाहनचालक : एक, शिपाई : पाच, कोतवाल : चार अशा एकूण १३० मंजूर पदांपैकी ३१ कर्मचाऱ्यांची भरती प्रक्रिया अपुरी आहे.