Jalna News : जालना जिल्ह्यातील पाच बाजार समितीच्या (Jalna Market Committee Election) होत असलेल्या निवडणुकीसाठी विविध मतदार संघांतून उमेदवारी अर्ज दाखल करणाऱ्या ५११ उमेदवारांपैकी ३०८ जणांनी उमेदवारी अर्ज मागे घेतले. त्यामुळे आता २०३ उमेदवार निवडणूक रिंगणात शिल्लक राहिले आहेत.

जालना जिल्ह्यातील अंबड, घनसावंगी, आष्टी, परतूर, मंठा या पाच बाजार समित्यांसाठी निवडणूक होते आहे.

सहकारी संस्था मतदार संघातील सर्वसाधारण, महिला राखीव, इतर मागासवर्ग, विमुक्त जाती, भटक्या जमाती, तसेच ग्रामपंचायत मतदार संघातील सर्वसाधारण, अनुसूचित जाती/ जमाती, आर्थिक दुर्बल घटक याशिवाय व्यापारी मतदारसंघ, हमालमापाडी मतदार संघातून प्रतिनिधी निवडण्यासाठी ही निवडणूक होते आहे.

पाचही बाजार समितीतून विविध मतदार संघांसाठी दाखल झालेल्या अर्जापैकी ५११ उमेदवारी अर्ज मंजूर करण्यात आले होते. २० एप्रिलला अर्ज मागे घेण्याच्या शेवटच्या मुदतीत ३०८ उमेदवारांनी आपले उमेदवारी अर्ज मागे घेतल्याने २०३ उमेदवार निवडणुकीच्या रिंगणात शिल्लक राहिले आहेत.

बाजार समिती सहकारी संस्था अंतर्गत सर्वसाधारण प्रवर्गातून प्रतिनिधी निवडण्यासाठी ७३ महिला राखीवमधून प्रतिनिधी निवडण्यासाठी २१ इतर मागास वर्गातून ९ विमुक्त जाती भटक्या जमातीमधून ११ असे एकूण ११४ अर्ज आहेत.

ग्रामपंचायत मतदार संघ अंतर्गत सर्वसाधारण जागेसाठी २९ अनुसूचित जाती जमाती १० आर्थिक दुर्बल घटकासाठी १० असे एकूण ४९ अर्ज आहेत, तर व्यापारी मतदार संघातून २२ व हमाल मापाडी मतदार संघातून १८ उमेदवार निवडणुकीच्या रिंगणात असल्याची माहिती जिल्हा उपनिबंधक कार्यालयाच्या वतीने देण्यात आली.

बाजार समितीनिहाय निवडणूक रिंगणातील उमेदवारांची संख्या

अंबड - ४५

घनसावंगी - ३७

आष्टी - ३६

परतूर - २३

मंठा - ६२

बाजार समितीनिहाय रिंगणातून माघार घेतलेल्या उमेदवारांची संख्या

अंबड - ५१

घनसावंगी- ६०

आष्टी - ४८

परतूर - ४०

मंठा - १०९