Rain Update In Bhandara : संततधार पाऊस, गारपीट आणि वादळी वाऱ्यामुळे पालांदूर परिसरात ३०० हेक्‍टरवरील पिकांचे नुकसान झाल्याचा अंदाज प्राथमिक अहवालात वर्तविण्यात आला आहे. त्यासोबतच १६३ घरांची पडझड झाली आहे.

लाखनी तालुक्‍यातील पालांदूर व परिसरातील बऱ्याच गावात मंगळवारी (ता. २) सायंकाळी बऱ्याच गावात सोसाट्याच्या वाऱ्यासह पाऊस व गारपीट झाली. वादळामुळे अनेकांच्या घरावरील छत उडाले. परिणामी, त्यांच्यावर निर्वासित होण्याची वेळ आली.

धानाचे पीक जमीनदोस्त होऊन मोठे नुकसान झाले. या भागात भाजीपाला लागवड करणाऱ्या शेतकऱ्यांची संख्या मोठी आहे. त्यांना देखील याचा फटका बसत उत्पादकता खर्चाची भरपाईदेखील शक्‍य झाली नाही.

अवकाळी पावसाच्या दणक्‍यात १३९ कोंबड्यांचा मृत्यू झाला. यात कुक्‍कुटपालक संजय हजारे यांचे लाखो रुपयांचे नुकसान झाले. काँग्रेसचे प्रदेशाध्यक्ष नाना पटोले यांच्यासह तहसीलदार महेश शितोळे, कृषी सहाय्यक यांनी नुकसानग्रस्त भागात जात पाहणी केली.