Sugarcane Season 2023-24 : राज्यातील ऊस गाळप हंगाम अंतिम टप्प्यात आला आहे. देशातही सध्या उसाचे गाळप वेगाने सुरू आहे. गेल्या हंगामाच्या तुलनेत यंदा साखर उत्पादनात मात्र घट झाल्याने चित्र आहे. राष्ट्रीय सहकारी साखर कारखाना महासंघाच्या आकडेवारीनुसार, १५ फेब्रूवारीपर्यंत देशातील ५०७ कारखान्यांमध्ये अद्यापही गाळप सुरू आहे.

चालू ऊस गाळप हंगामात देशातील एकूण ५३३ साखर कारखान्यांनी गाळप हंगामात सहभाग घेतला. गाळप हंगामात सहभागी झालेल्या ५३३ पैकी २६ कारखान्यांचा गाळप संपल्याने बंद झाले आहे. चालू गाळप हंगामात देशात आतापर्यंत २२६८.२७ लाख टन उसाचे गाळप झाले आहे. या गाळप झालेल्या उसातून २२३.६० लाख टन साखरेचे उत्पादन झाले आहे.

२०२२-२३ या मागील वर्षीच्या हंगामात याच कालावधित ५३४ कारखान्यांनी ऊस गाळप केले होते, तर ३१ कारखान्यांचे गाळप बंद झाले होते. गेल्या हंगामात याच कालावधित २३६२.३० लाख टन उसाचे गाळपातून २२८.८० लाख टन साखर उत्पादित झाली होती.

दरम्यान, गेल्या हंगामाच्या तुलनेत यंदा साखर उतारा जास्त राहिला आहे. १५ फेब्रवारीपर्यंत देशातील साखर उतारा ९.८६ टक्के इतका आहे. तर, गेल्या हंगामात याच कालावधित साखर उतारा ९.६९ टक्के होता.

चालू हंगामात महाराष्ट्राने ७९.४५ लाख टनसह साखर उत्पादनात आघाडी घेतली आहे. तर उत्तर प्रदेश साखर उत्पादनात दुसऱ्या क्रमांकावर आहे. उत्तर प्रदेशात आतापर्यंत ६८.४० लाख टन साखर उत्पादित झाली आहे.