Kolhapur News : जिल्ह्यातील ११ लाख ५० हजार शेतकऱ्यांना ॲग्रीस्टॅक योजनेअंतर्गत फार्मर आयडी काढून देण्याचे काम सुरू आहे. जिल्ह्यातील बारा तालुक्यांमधील १ लाख ५१ हजार ९६४ शेतकऱ्यांनी नोंदणी करून फार्मर आयडी काढले आहेत.

ॲग्रीस्टॅक अंतर्गत सुरू असलेले जिल्ह्यातील कामकाज समाधानकारक असून याच गतीने उर्वरित शेतकऱ्यांची नोंदणी फार्मर आयडीसाठी करण्याच्या सूचना जिल्हाधिकारी अमोल येडगे यांनी तालुकास्तरीय यंत्रणेला केल्या. जिल्हाधिकारी कार्यालयातील श्री शाहू सभागृहातून व्हीसीद्वारे त्यांनी तालुका प्रशासनाशी संवाद साधला.

या वेळी उपजिल्हाधिकारी महसूल डॉ. संपत खिलारी, जिल्हा अधीक्षक कृषी अधिकारी जालिंदर पांगारे, प्रांत अधिकारी हरीश धार्मिक, जिल्हा आरोग्य अधिकारी डॉ. अनिरुद्ध पिंपळे, जिल्हा शल्यचिकित्सक डॉ. सुप्रिया देशमुख, तहसीलदार स्वप्नील रावडे, आयुष्यमान भारतचे नोडल डॉ. रोहित तसेच तालुका स्तरावरून उपविभागीय अधिकारी, तहसीलदार, तालुका कृषी अधिकारी, तालुका आरोग्य अधिकारी तसेच अन्य अधिकारी उपस्थित होते.

कोल्हापूर जिल्ह्यात दीड लाख शेतकऱ्यांचे फार्मर आयडी तयार करून राज्यात पाचव्या क्रमांकावर आहे. याच प्रकारे जिल्ह्यात ॲग्रीस्टॅकचे काम सुरू राहिले तर फेब्रुवारीअखेर संपूर्ण जिल्ह्यातील ११ लाख ५० हजार शेतकऱ्यांचे फॉर्म आयडी काढून होतील.

त्यामुळे प्रत्येक गावातील सुरू असलेल्या कॅम्पला गती देऊन सर्व फार्मर आयडी वेळेत पूर्ण होतील यासाठी यशस्वी नियोजन करण्याच्या सूचना त्यांनी सर्व तालुकास्तरीय यंत्रणेला केल्या. ॲग्रीस्टॅक योजनेमधून फार्मर आयडी तयार करीत असताना प्राधान्याने पंतप्रधान किसान सन्मान योजनेमधील लाभार्थ्यांचेही फार्मर आयडी काढण्याचे निर्देश त्यांनी दिले.

काय आहे ॲग्रीस्टॅक योजना?

या अंतर्गत जिल्ह्यातील सर्व शेतकऱ्यांचा व त्यांच्या शेतांचा आधार संलग्न माहिती संच (फार्मर रजिस्ट्री), शेतकऱ्यांच्या शेतातील हंगामी पिकांची माहिती संच (क्रॉप सोन रजिस्ट्री) व शेतांचे भू संदर्भिकृत (जिओ रेफरन्स लँड पार्सल) यांचा माहिती संच एकत्रितरीत्या तयार करणे व तो सातत्याने अद्ययावत करणे या बाबी यामध्ये अंतर्भूत आहेत.