Sindhudurg News : सिंधुदुर्ग जिल्ह्यात जनावरांमध्ये लम्पी स्कीन या त्वचा आजाराचा कहर सुरू असून बाधित जनावरांच्या संख्येत वाढ होत आहे. मात्र पशुसंवर्धन विभागातील अधिकारी-कर्मचाऱ्यांची मंजूर २८६ पैकी तब्बल १४५ पदे रिक्त आहेत. त्यामुळे लम्पी स्कीनचा प्रादुर्भाव रोखण्याचे मोठे आव्हान पशुसंवर्धन विभागासमोर असून सध्या कार्यरत ५० टक्के कर्मचाऱ्यांची दमछाक होत आहे.

सिंधुदुर्ग जिल्ह्यात सध्या लम्पी स्कीनने धुमाकूळ घातला आहे. आजाराची लागण जनावरांना होत असून जनावरे दगावण्याचे प्रमाणदेखील वाढत आहे. गेल्या वर्षभरात जिल्ह्यात १५९ जनावरे दगावली.  जनावरांच्या संख्येच्या तुलनेत हा आकडा मोठा आहे. जुलैपासून लम्पी स्कीनने पुन्हा डोके वर काढले असून सध्या लम्पी स्कीनबाधित जनावरांची संख्या ३५५ आहे.

आजार नियत्रंणात आणण्याची जबाबदारी असलेल्या पशुसंवर्धन विभागात सध्या ५० टक्केच अधिकारी-कर्मचारी कार्यरत आहेत. राज्य शासन आणि जिल्हा परिषद असे दोन स्वतंत्र पशुसंवर्धन विभाग जिल्ह्यात आहेत. मात्र दोन्ही पशुसंवर्धन विभागांतील सहायक आयुक्त संवर्धन, पशुधन विकास अधिकारी, सहायक पशुधन विकास अधिकारी, पशुधन पर्यवेक्षक, व्रणोपचारक, परिचर अशी सर्वच पदे रिक्त आहेत. एकूण २८६ पैकी १४५ पदे रिक्त आहेत. त्यामुळे पशुसंवर्धन विभागाचा भार ५० टक्के अधिकारी-कर्मचाऱ्यांवर असून लम्पी स्कीन नियंत्रणात ठेवताना या अधिकारी-कर्मचाऱ्यांची दमछाक होत आहे. लसीकरण, लम्पी स्कीनबाधित जनावरांवर उपचार, विविध आजाराने त्रस्त जनावरांवर उपचार सध्या या कर्मचाऱ्यांना करावे लागत आहे.