Pune News: पुणे जिल्ह्याच्या पश्चिम पट्ट्यात गेल्या आठवड्यापासून पावसाचा चांगलाच जोर आहे. त्यामुळे धरणांत पाण्याची आवक वाढत आहे. मंगळवारी (ता.१७) सकाळी आठ वाजेपर्यंत मुळशी धरणक्षेत्रात सर्वाधिक १४० मिलिमीटर पाऊस पडल्याची नोंद झाली. मागील चोवीस तासांमध्ये धरणांत ४.५४ टीएमसी नव्याने पाण्याची आवक झाली असून, एकूण ५९.०७ टीएमसी म्हणजेच सुमारे ३० टक्के एवढा पाणीसाठा झाला आहे.

मे महिन्यात जिल्ह्यातील धरणक्षेत्रात मॉन्सूनपूर्व पावसाचा जोर कमी-अधिक होता. महिन्याच्या शेवटच्या आठवड्यात धरणक्षेत्रात पावसाचा बऱ्यापैकी जोर होता. त्यामुळे ओढे, नाले ओसंडून वाहू लागले होते. यामुळे जिल्ह्यातील २६ धरणांत नव्याने मोठ्या प्रमाणात पाण्याची आवक झाली आहे.

३१ मेपर्यंत धरणांत उपयुक्त जवळपास २० टीएमसी पाण्याचा येवा दाखल झाला होता. त्यानंतर पंधरा दिवस पावसाने उघडीप दिली. त्यानंतर पुन्हा मागील चार ते पाच दिवसांपासून अधूनमधून सरी बरसत आहेत. मुळशी धरणक्षेत्रात आत्तापर्यंत ५०३ मिलिमीटर पाऊस झाला. तर, इतर धरणक्षेत्रात तुलनेने कमी पाणीसाठा नोंदवला गेला.

मंगळवारी सकाळी आठ वाजेपर्यंतच्या चोवीस तासांमध्ये घाटमाथ्यावरही जोरदार पाऊस झाला. यामध्ये लोणावळा घाटमाथ्यावर ११३ मिलिमीटर पाऊस झाला. तर ठोकरवाडी ५९, वळवण ६८, कुंडली ५६, शिरोटा ३३ मिलिमीटर पाऊस झाला. तर येडगाव, वडज, घोड, वीर, नाझरे येथे तुरळक सरी पडल्या असून शेटफळ, विसापूर, उजनी धरणक्षेत्रात पावसाची उघडीप होती.

मंगळवार (ता.१७) सकाळी आठवाजेपर्यंत झालेला धरणनिहाय पाऊस (मिलिमीटरमध्ये)

मुळशी १४०, टेमघर ९५, वरसगाव ६१, पानशेत ५२, खडकवासला १९, पवना ७०, कासारसाई ३६, कळमोडी ५१, चासकमान ३५, भामा आसखेड २१, आंध्रा ३७, वडिवळे ५५, गुंजवणी ६८, भाटघर २४, नीरा देवघर ४६, पिंपळगाव जोगे १४, माणिकडोह ३०, डिंभे ३०, चिल्हेवाडी १५.