Nanded News : रेशीम संचालनालयाच्या वतीने नांदेड जिल्ह्यात सन २०२३-२४ करिता रेशीम शेतीला चालना देण्यासाठी एक हजार एकराचे उद्दिष्ट देण्यात आले आहे.

या वेळी कृषी विभागाला चारशे एकर, जिल्हा परिषद विभागाला तीनशे, तर रेशीम विभागाला तीनशे एकर असे एकूण एक हजार हेक्टरवर तुती लावगडी उद्दिष्ट देण्यात आल्याची माहिती रेशीम विकास अधिकारी नृसिंह बावगे यांनी दिली.

जिल्ह्यात यापूर्वी केवळ रेशीम विकास कार्यालयालाच रेशीम लागवडीबाबत प्रशासकीय मान्यता देण्याचे अधिकारी होते. परंतु यात शासनाने बदल करून यापुढे कृषी विभाग तसेच जिल्हा परिषदेलाही अधिकारी देऊन त्यांना लागवडीबाबत उद्दिष्टे देण्यात आली आहेत.

सन २०२३-२०२४ या वर्षासाठी नवीन आदेश काढून शासनाने रेशीम लागवडीच्या प्रशासकीय मान्यतेचा अधिकार आता कृषी विभाग, तसेच जिल्हा परिषद प्रशासनाला बहाल केला आहे.

यामुळे शेतकऱ्यांचा वेळ तसेच खर्च वाचून लागवडी वाढतील, असा विश्‍वास व्यक्त होत आहे. आगामी हंगामाची पूर्वतयारी, तसेच प्रचार-प्रसिद्धीसाठी रेशीम विकास अधिकारी कार्यालयाच्या वतीने लवकरच महारेशीम अभियान राबविण्यात येणार आहे.