Satara News: देशात २४ वर्षांत ७८ पुरस्कार घेणाऱ्या पाटण तालुक्यातील मान्याचीवाडी ग्रामपंचायतीने ग्रामविकासात एक-एक पाऊल पुढे टाकत आहे. क्यूआर कोडच्या माध्यमातून सर्व खातेदारांनी घरातूनच ग्रामपंचायतीचा कर भरणा करून वेगळा आदर्श घालून दिला. या सुविधांमुळे नवीन आर्थिक वर्षाच्या पहिल्याच दिवशी शंभर टक्के उद्दिष्ट पूर्ण करत २५ वर्षांची परंपरा कायम ठेवली आहे.

मान्याचीवाडी (ता. पाटण) येथील ग्रामस्थांनी गेल्या वीस वर्षांत लोकसहभागातून गावाचा चेहरामोहराच बदलून टाकला आहे. अवघ्या साडेचारशे लोकसंख्येची मान्याचीवाडी आतापर्यंत शासनाच्या तब्बल ७८ पुरस्कारांची मानकरी ठरली आहे. या गावाने नानाजी देशमुख सर्वोत्तम पंचायत सतत विकास पुरस्कार मिळवत देशपातळीवर आपल्या कामाचा ठसा उमटवला आहे.

शासनाच्या ग्रामीण विकासाच्या विविध योजनांमध्ये मान्याचीवाडीचा सहभाग नेहमीच उल्लेखनीय असतो. ग्रामपंचायत गावातील खातेदारांकडून आरोग्य कर, वीज कर, पाणीपट्टी, व्यवसाय कर, घरफळा आदींची कराच्या माध्यमातून वसुली करते. खातेदारांना जिथे असतील तिथूनच कर भरणा करता यावा, यासाठी ग्रामपंचायतीच्या नावे क्यूआर कोड काढला आहे. गावातील प्रत्येक खातेदाराच्या घरावर तो लावल्याने सर्व खातेदार घरातूनच भरणा करत आहेत.

आर्थिक वर्षाच्या पहिल्याच दिवशी एक वर्षाचा आगाऊ कर भरणा करण्याची या ग्रामपंचायतीची परंपरा आहे. सलग २५ वर्षांपासून गावकऱ्यांनी ही परंपरा जपली आहे. गावातील काही ग्रामस्थ नोकरी, व्यवसायानिमित्त परराज्यात राहतात. त्यांनीही तेथूनच घरपट्टी, वीज कर, आरोग्य कर क्यूआर कोडवरून थेट ग्रामपंचायतीच्या खात्यात जमा केला.

ग्रामस्थांना ग्रामपंचायतीच्या माध्यमातून अपेक्षित असणाऱ्या सुविधा विनाअडथळा पुरविल्या जात असल्यामुळे येथील खातेदार आर्थिक वर्षाच्या पहिल्याच दिवशी करभरणा करून ग्रामपंचायतीला सहकार्य करत असल्याचे ग्रामसेवक प्रसाद यादव यांनी सांगितले. एक एप्रिलला ग्रामपंचायतीची शंभर टक्के कर वसुली पूर्ण झाली.

या उपक्रमाबद्दल जिल्हा परिषदेच्या मुख्य कार्यकारी अधिकारी याशनी नागराजन, उपमुख्य कार्यकारी अधिकारी अर्चना वाघमाळे, गटविकास अधिकारी सविता पवार आदींनी अभिनंदन केले.