नाशिक : जिल्ह्यात टोमॅटो हंगामाने वेग घेतला असून, गत सप्ताहातही टोमॅटोच्या दरातील तेजी कायम असल्याचे चित्र दिसून आले.
जिल्ह्यात पिंपळगाव बसवंत, लासलगाव या बाजार समित्यांसह गिरणारे, वणी, पिंपळनारे या शिवार सौद्यातील बाजारातही टोमॅटोची आवक झाली. या वेळी टोमॅटोच्या प्रति२० किलोच्या क्रेटला ४०० ते ७०० रुपये, तर सरासरी ६०० रुपये दर मिळाले. मागील महिनाभरापासून टोमॅटोच्या दरातील तेजी टिकून आहे.
नाशिक जिल्ह्यातून उत्तर भारतासह बांगलादेश, श्रीलंका, दुबई या देशांत टोमॅटोची निर्यात होते. यंदा मागणीच्या तुलनेत आवकेत ६० टक्क्यांची घट असल्याने टोमॅटोला मागणी कायम असल्याचे बाजारातील सूत्रांनी सांगितले. नाशिक भागातील टोमॅटो पिकाला मागील महिन्यात जोरदार पावसाने झोडपले. या स्थितीत उत्पादनात निम्म्याहून अधिक घट झाली आहे.
गिरणारे बाजारात दररोज सरासरी ५० हजार क्रेटची आवक होत असताना टोमॅटोला प्रति२० किलोच्या क्रेटला ४०० ते ७०० असा दर मिळतो आहे. बाजाराची स्थिती येत्या सप्ताहातही कायम राहील, असा अंदाज जाणकारांनी वर्तवला आहे. येत्या काळात आवक वाढण्याची शक्यता नाही. या स्थितीत देशांतर्गत तसेच निर्यातीची मागणी पूर्ण करण्यासाठी व्यापाऱ्यांकडून मागणी होत आहे.
पिंपळगाव बसवंत या बाजार समितीत टोमॅटोची सर्वाधिक म्हणजे दररोज १ लाख २० हजार क्रेटची आवक होते. ऑगस्ट, सप्टेंबर महिन्यात पिंपळगाव बसवंत बाजार समितीत दररोज किमान ३ लाख क्रेटची आवक झाली. दरम्यान, पावसाने नाशिक भागातील टोमॅटोला झोडपल्यानंतर आवकेत मोठी घट होत गेली. मागील वर्षी टोमॅटो उत्पादकांना खर्च निघेल इतकाही दर मिळाला नाही.
यंदा नैसर्गिक आपत्तीतून वाचलेल्या टोमॅटोला गतवर्षीच्या तुलनेत चांगला दर मिळत असल्याने दिलासा मिळाला आहे; मात्र यंदा खर्चातही मोठी वाढ झाली आहे. या स्थितीत सध्याचा दर अजून महिनाभर टिकून राहिल्यास शेतकऱ्यांचा खर्च भरून निघण्यास मदत होईल, असे टोमॅटो बाजारातील जाणकारांनी सांगितले.