कोल्हापूर : येथील कृषी उत्पन्न बाजार समितीत या सप्ताहात टोमॅटोचे दर तेजीत होते. टोमॅटोस दहा किलोस ७० ते ३२० रुपये दर होता. गेल्या सप्ताहाच्या तुलनेत टोमॅटोच्या दरात दहा ते पंधरा टक्के वाढ झाल्याची माहिती बाजार समितीच्या सूत्रांनी दिली. टोमॅटोची दीड ते दोन हजार क्रेट आवक झाली. गेल्या सप्ताहाच्या तुलनेत टोमॅटोची आवक काहीशी मंदावल्याने टोमॅटोचे दर वाढल्याची माहिती भाजीपाला विभागाच्या सूत्रांनी दिली. 

वांग्याची चारशे ते पाचशे पोती आवक झाली. वांग्यास दहा किलोस ६० ते २५० रुपये दर मिळाला. गेल्या काही दिवसांपासून जिल्ह्यात ढगाळ हवामान वाढत आहे. उष्णता कायम असल्याने वांग्यावर रोग किडीचा प्रादुर्भाव अधिक होत आहे. परिणामी वांग्याचे व्यवस्थापन करणे अडचणीचे ठरत असल्याचे वांगी उत्पादकांनी सांगितले. 

शिरोळ तालुक्‍याबरोबर मिरज, वाळवा तालुक्‍यातूनही वांग्याची आवक होत असल्याचे बाजार समितीतून सांगण्यात आले. ओल्या मिरचीची तीनशे ते चारशे पोती आवक होती. ओली मिरचीस दहा किलोस २०० ते ५०० रुपये दर होता. गवारीची पंचवीस ते पन्नास पोती आवक झाली. गवारीस दहा किलोस १८० ते २७० रुपये दर होता. भेंडीस दहा किलोस ५० ते २५० रुपये दर मिळाला. गाजराची तीस ते पन्नास पोती आवक झाली. गाजरास दहा किलोस २७० ते ३०० रुपये दर होता. 

पालेभाज्यांची कोथिंबीरीची पंधरा ते वीस हजार पेंढ्या आवक झाली. कोथिंबिरीस शेकडा ३०० ते १४०० रुपये दर होता. मेथीस शेकडा १४०० ते १८०० रुपये दर मिळाला. हापूस आंब्याची तीन ते पाच हजार पेट्या आवक झाली. हापूसला दोन डझनाच्या बॉक्‍सला ५० ते २२५ रुपये दर होता.