जळगाव  ः कृषी उत्पन्न बाजार समितीमध्ये सोमवारी (ता. ३) लाल कांद्याची सुमारे १५०० क्विंटल आवक झाली. किमान ३०० व कमाल ७०० रुपये प्रतिक्विंटलचे दर मिळाले. दरात दोन दिवसांत क्विंटलमागे २०० ते ३०० रुपयांची घट झाली असून, पूर्वमोसमी पावसाचे संकेत लक्षात घेऊन आवक वाढल्याने व्यापारी व अडतदार यांनी मिलीभगत करून हे दर पाडल्याचा दावा शेतकरी करीत आहेत.  जळगाव, अडावद (ता. चोपडा), चाळीसगाव येथील बाजारात लाल कांद्याच्या दरात घट झाली आहे. जूनमध्ये शेतकऱ्यांना पैशांची आवश्‍यकता असते, पाऊस आला तर शेतात साठविलेल्या कांद्याचे नुकसान होईल, या भीतीने सोमवारी लाल कांदा अनेक शेतकऱ्यांनी आणला. परिणामी आवक वाढली. बाजारातील चित्र लक्षात घेऊन अडतदार व व्यापारी यांनी दर पाडले. शुक्रवारी (ता. ३१ मे) कांद्याचे दर १००० रुपये प्रतिक्विंटलपर्यंत होते. किमान दर ४५० रुपयांपर्यंत होते. सोमवारी मात्र दर्जेदार कांद्यासही ७०० रुपयांपर्यंतचे दर मिळाले. आवक जळगाव, पाचोरा, भुसावळ, धुळे या भागातून होत आहे. कांद्याची काढणी जिल्ह्यात आटोपली आहे. लागवड कमी झाली होती. आवक मागील हंगामाच्या तुलनेत अधिक असतानादेखील दर हवे तसे नाहीत. किमान दर १२५० ते १५०० रुपये प्रतिक्विंटलपर्यंत मिळावेत, असे शेतकऱ्यांचे म्हणणे आहे. 

जळगाव, धुळे बाजार समितीमधील खरेदीदारांना समज द्या लाल कांद्याचे दर धुळ्यासह जळगाव बाजार समितीत कमी आहेत. आवक कमी असताना दर्जेदार कांद्याचे दर कमी कसे? मागील वर्षी कमाल दर २५ ते २८ रुपये प्रतिकिलोपर्यंत बाजार समितीत मिळाले होते. मागील हंगामात मे अखेरीस आवक २४०० ते २५०० क्विंटलपर्यंत होती. या हंगामात आवक कमी, कांद्याचा दर्जा चांगला असताना दर कमी का? यासंदर्भात जळगाव व धुळे येथील बाजार समितीमधील खरेदीदार व अडतदार यांची चौकशी करण्याची मागणी शेतकऱ्यांनी केली आहे.