नगर ः नगर कृषी उत्पन्न बाजार समितीत गेल्या आठवडाभरात गावरान ज्वारीची आवक वाढू लागली आहे. गेल्या आठवडाभरात गावरान ज्वारीची २६८ क्विंटलची आवक होऊन ज्वारीला अडीच हजार ते चार हजार रुपयांचा दर मिळाला. बाजरीचीही आवक चांगली होत असून, बाजरीची २१९ क्विंटलची आवक होऊन १५३१ ते दोन हजार चारशे रुपयांचा दर मिळाला. नगर, सोलापूर, मराठवाड्यातील काही भागांतून येथे आवक होत असल्याने नगर कृषी उत्पन्न बाजार समितीत दरवर्षी जानेवारी-फेब्रुवारी महिन्यांत गावरान ज्वारीची आवक वाढत असते. यावर्षी आठवडाभरापासून काहीशी आवक वाढली असली तरी दरवर्षीच्या तुलनेत यंदा आवक कमी होत आहे. गेल्या आठवडाभरात काबुली चण्याची १४ क्विंटलची आवक होऊन तीन हजार चारशे ते तीन हजार सातशे रुपयांचा दर मिळाला. तुरीची २८७ क्विंटलची आवक झाली मात्र तुरीची हमीदरापेक्षा कमी दरानेच खरेदी केली जात आहे. तुरीला प्रतिक्विंटल तीन हजार पाचशे ते चार हजार सहाशे पंचवीस रुपयांचा दर मिळाला. हरभऱ्याची १९८ क्विंटलची आवक होऊन ३२७५ ते तीन हजार चारशे रुपयांचा दर मिळाला. मुगाची ४५ क्विंटलची आवक होऊन सहा हजार शंभर ते सात हजार रुपयांचा दर मिळाला. मक्याची ३५ क्विंटलची आवक होऊन एक हजार नऊशे पन्नास रुपयांचा दर मिळाला. गुळाची ३७६ क्विंटलची आवक होऊन दर हजार नऊशे पन्नास ते चार हजार पाचशे रुपयांचा दर मिळाला. लाल मिरचीची आवकही टिकून आहे.  आठवडाभरात लाल मिरचीची ४१२ क्विंटलची आवक होऊन पाच हजार आठशे वीस ते चौदा हजार चौसष्ट रुपयांचा दर मिळाला. या महिन्यात ज्वारीची आवक वाढेल असे बाजार समितीचे सचिव अभय भिसे यांनी सांगितले.