जळगाव : खानदेशात केळीचे दर पुन्हा दबावात आले आहेत. उत्तरेकडून कमी झालेली मागणी व लॉकडाऊन, कोरोनाची भिती, यामुळे दरात चढउतार सुरू आहेत. प्रतिक्विंटल २५० ते ५०० रुपयांपर्यंतचे दर आहेत. 

सध्या जळगाव जिल्ह्यातील रावेर, मुक्ताईनर, यावल, जळगाव, धुळ्यातील शिरपूर, नंदुरबारमधील तळोदा, शहादा, अक्कलकुवा भागात केळीची काढणी सुरू आहे. उतिसंवर्धित रोपांच्या केळी बागांची लागवड रावेर, यावल, शिरपूर, शहादा भागात अधिक झाली होती. या भागात दर्जेदार केळीचे उत्पादन येत आहे. तर, इतर भागातही चांगले व्यवस्थापन करून दर्जेदार केळीचे उत्पादन शेतकरी घेत आहेत. परंतु, केळी दर २०१५-१६ नंतर नीचांकी पातळीवर प्रथमच पोचले आहेत. 

मध्यंतरी रमजानमुळे उत्तरेकडे केळीची चांगली मागणी होती. एकट्या रावेरातून रोज १८० ते १८५ ट्रक (एक ट्रक १५ मेट्रिक टन क्षमता) केळीची पाठवणूक उत्तरेकडे सुरू होती. तसेच मुक्ताईनगर, यावल भागातील केळीची खरेदी मध्यप्रदेशातील एजंटदेखील करीत होते. परंतु, रमजान महिना जसा अंतिम टप्प्यात पोचला, तशी केळीची मागणी कमी होत गेली. आवक स्थिर आहे. सध्या रावेर, यावल, मुक्ताईनगर भागात मिळून रोज २६० ट्रक तर धुळ्यातील शिरपूर, नंदुरबार जिल्ह्यात मिळून रोज ६० ते ६५ ट्रक केळीची काढणी सुरू आहे. अर्थातच खानदेशात रोज किमान ३२० ते ३३५ ट्रक केळीची आवक सुरू आहे.  ‘पणन’चा गोंधळ कायम 

केळीला सर्वाधिक मागणी उत्तर भारतात असते. तसेच राज्यात नागपूर, पुणे, मुंबई, छत्तीसगड येथेही केळीची पाठवणूक केली जाते. राज्यात कोरोनामुळे निर्माण झालेला पणन व्यवस्थेचा गोंधळ कायम आहे. अनेक ग्राहक भितीमुळे केळीची खरेदी टाळत आहेत. तर, पुणे, मुंबईमध्ये बाजार विस्कळीत झाले आहेत. परिणामी, राज्यात केळीची हवी तशी मागणी नाही, अशी माहिती केळी व्यापारातील जाणकार सुधाकर चव्हाण यांनी दिली.