Hyderabad News भारत राष्ट्र समिती (Bharat Rashtr Samiti) हे शेतकऱ्यांच्या उत्थानासाठीचे राजकीय आंदोलन आहे, असे प्रतिपादन भारत राष्ट्र समितीचे संस्थापक अध्यक्ष तेलंगाणाचे मुख्यमंत्री के. चंद्रशेखर राव (K. Chandrashekhar Rao) यांनी हैदराबाद येथे केले.

बंजारा हिल्स परिसरातील भारत राष्ट्र समितीच्या मुख्यालयात आयोजित कार्यक्रमात या वेळी शेतकरी संघटनेच्या युवा आघाडीचे प्रदेशाध्यक्ष सुधीर बिंदू, उपाध्यक्ष कैलास तवार, मराठवाडा विभाग प्रमुख रामजीवन बोंदर, महिला आघाडीच्या सुवर्णा काटे आदींसह कार्यकर्त्यांनी भारत राष्ट्र समिती मध्ये प्रवेश केला. या वेळी ते बोलत होते.

या वेळी तेलंगणाचे अर्थमंत्री हरीश राव, मंत्री सत्यवथी राठोड, बी. बी. पाटील, आमदार जीवन रेड्डी, आमदार बालका सुमन, किसान समितीचे राष्ट्रीय अध्यक्ष गुरुनाम चुडणी, बीआरएस किसान सेलचे महाराष्ट्र प्रदेशाध्यक्ष अध्यक्ष माणिक कदम आदींसह मंत्री, खासदार, आमदार यांच्यासह पदाधिकारी उपस्थित होते.

राव म्हणाले, की शेती आणि शेतकऱ्यांच्या विकासासाठी रस्त्यावरच्या आंदोलनापेक्षा राजकीय आंदोलन करणे गरजेचे आहे. भारत राष्ट्र समिती हे शेतकरी हिताचे धोरण ठरविण्यासाठीचे राजकीय आंदोलन आहे. या माध्यमातून किसान सरकारची स्थापना करून शेतकरी हिताचे धोरण देशभर राबविणार.

तेलंगणा राज्यात गेल्या नऊ वर्षांपासून राबविण्यात येणाऱ्या शेती योजनांची माहिती त्यांनी या वेळी देऊन अशाच योजना भारत राष्ट्र समितीच्या माध्यमातून देशभर राबविणार असल्याचे राव म्हणाले.