Parbhani News: जुनी पेन्शन योजना (Old Pension Scheme) लागू करावी, या प्रमुख मागणीसह इतर मागण्यांसाठी मंगळवार (ता. १४)पासून पुकारण्यात आलेल्या राज्यव्यापी बेमुदत संपात परभणी जिल्ह्यातील कृषी (Agriculture Department), महसूल, ग्रामविकास (Rural Development Department) यासह विविध विभागांचे कर्मचारी सहभागी झाले आहेत. त्यामुळे कार्यालयीन कामकाज ठप्प झाले आहे.

राज्य सरकारी कर्मचारी मध्यवर्ती संघटनेतर्फे १ नोव्हेंबर २००५ नंतर नियुक्त कर्मचाऱ्यांना जुनी पेन्शन योजना पूर्वलक्षी प्रभावाने लागू करावी. कंत्राटी कर्मचाऱ्यांना सेवेत नियमित करावे. रिक्त पदे भरावीत. अनुकंपा तत्त्वावरील नियुक्त्या बिनशर्त कराव्यात.

आठवा वेतन आयोग स्थापन करण्याची कार्यवाही सुरू करावी आदी मागण्यांसाठी मंगळवार (ता.१४)पासून राज्यव्यापी बेमुदत संप पुकारला आहे. या संपात सहभागी कर्मचाऱ्यांनी संबंधित कार्यालयासमोर आंदोलन केले.

संपामुळे कार्यालयीन कामकाज ठप्प झाल्याने नागरिकांची गैरसोय होत आहे. वसंतराव नाईक मराठवाडा कृषी विद्यापीठ अंतर्गत कर्मचाऱ्यांनी काळ्या फिती लावून कामकाज करत या संपाला पाठिंबा दिला आहे.