Pune News : पाऊस कालावधीचा सव्वा महिना उलटला तरी धरणक्षेत्रात पुरेसा पाऊस झालेला नाही. त्यामुळे जिल्ह्यातील अजूनही १४ धरणांतील पाण्यामध्ये वाढ झालेली नाही. त्यामुळे चिंताजनक स्थिती तयार झाली आहे. येत्या काळात पुरेसा पाऊस न झाल्यास भविष्यात पाण्याचे मोठे संकट निर्माण होण्याची शक्यता आहे.

२४ जूननंतर जिल्ह्याच्या पश्चिम भागात पावसाचा जोर वाढला होता. सुरवातीच्या दोन ते तीन दिवस पावसाचा जोर कमी होता.

त्यानंतर २५-२६ जूनपासून पावसाचा जोर काहीसा वाढला. या काळात धरणक्षेत्रात आणि पश्चिम घाटमाथ्यावर मध्यम ते जोरदार स्वरूपाचा पाऊस पडला. या पावसामुळे ओढे, नाले चांगलेच वाहते झाले. त्यानंतर मात्र पावसाचा जोर काहीसा ओसरला आहे.

आत्तापर्यंत ठराविक धरण क्षेत्रात जोरदार पाऊस पडला असला तरी बहुतांश धरणक्षेत्रांत अजूनही पावसाची प्रतीक्षा आहे.

यंदा मुठा खोऱ्यातील टेमघर, वरसगाव, पानशेत, खडकवासला या धरणक्षेत्रात जोरदार पाऊस झाला आहे. त्यामुळे या धरणांत आत्तापर्यंत नव्याने ४.३३ टीएमसी पाण्याची आवक झाली आहे.

या सर्वच धरणांत गेल्या वर्षीच्या तुलनेत अधिक पाणीसाठा झाला आहे. परंतु नीरा आणि कुकडी खोऱ्यातील धरणक्षेत्रात अजूनही पुरेसा पाऊस झालेला नाही. या धरणक्षेत्रात अधूनमधून तुरळक सरी बरसत आहेत.

गेल्या वर्षीच्या तुलनेत या धरणांत पाणी साठा कमी असल्याने जोरदार पावसाची प्रतीक्षा आहे. यामध्ये कासारसाई, भामा आसखेड, आंध्रा, शेटफळ, नाझरे, गुंजवणी, वीर, पिंपळगाव जोगे, येडगाव, वडज, डिंभे, घोड, विसापूर, उजनी अशा धरणांत पुरेसा पाणीसाठा झालेला नाही.

घाटमाथ्यावर जोर

सध्या ठोकरवाडी, शिरोटा, वळवण, लोणावळा, कुंडली, ताम्हिणी या घाटमाथ्यावर पाऊस होत आहे. परंतु या घाटमाथ्यावरील सर्व पाणी हे खासगी धरणांत जात आहे. मुळशी, पवना, कळमोडी, चासकमान, वडिवळे, भाटघर, नीरा देवघर, येडगाव, चिल्हेवाडी अशा धरणक्षेत्रांत बऱ्यापैकी पाऊस झाल्याने धरणांतील पाण्यामध्ये काहीशी वाढ झाली आहे. याच धरणक्षेत्रात पावसाच्या बऱ्यापैकी सरी कोसळत असल्याने पाणीसाठ्यात हळूहळू वाढ होत आहे.