नांदेड : नांदेड प्रादेशिक सहसंचालक (साखर) विभागांतर्गत यंदा तीस साखर कारखान्यांनी (Sugar Factory) गाळप परवान्यासाठी (Sugarcane Crushing) अर्ज केले आहेत. यापैकी १४ खासगी तर सहा सहकारी असे एकूण वीस साखर कारखाने सुरू झाले आहेत. या साखर कारखान्यांनी आजपर्यंत सात लाख २३ हजार टन उसाचे गाळप केल्याची माहिती साखर सहसंचालक कार्यालयाच्या सूत्राने दिली.

गाळप हंगाम २०२२-२०२३ साठी नांदेड विभागातील ३० साखर कारखान्यांनी नांदेड प्रादेशिक सहसंचालक (साखर) कार्यालयाच्या मार्फत राज्याच्या साखर आयुक्तांकडे गाळपासाठी ऑनलाइन प्रस्ताव सादर केला होता. यात २१ खासगी तर नऊ सहकारी साखर कारखान्याचा समावेश आहे. गाळप हंगाम सुरू होऊन एक महिन्याचा कालावधी उलटला असला तरी नांदेड विभागातील १४ खासगी तर सहा सहकारी असे एकूण वीस साखर कारखाने सुरू झाले आहेत.

या साखर कारखान्यांनी आजपर्यंत सात लाख २३ हजार ४६० टन उसाचे गाळप तर पाच लाख ५८ हजार ६५५ क्विंटल साखरेचे उत्पादन केल्याची माहिती साखर सहसंचालक कार्यालयाच्या सूत्राने दिली. सुरू झालेल्या साखर कारखान्यात नांदेड जिल्ह्यातील एक सहकारी व तीन खासगी कारखान्याचा समावेश आहे. तर परभणी जिल्ह्यातील पाच खासगी, हिंगोली दोन खासगी व तीन सहकारी हिंगोली जिल्ह्यातील दोन खासगी व तीन सहकारी तर लातूर जिल्ह्यातील चार खासगी व दोन सहकारी साखर कारखाने सुरू झाल्याची माहिती सूत्राने दिली.