नाशिक : आदिवासी बांधवांच्या कलाकुसरीला (Tribal Handicraft) हक्काची बाजारपेठ मिळण्यासाठी आणि त्यांच्या कलांचे कायमस्वरूपी जतन व संवर्धन (Tribal Art) करण्यासाठी आदिवासी विकास विभागातर्फे ‘आदिहाट’ उपक्रम (Adihat Project) सुरू झाला.

आदिवासी विकासच्या आयुक्त आयुक्त नयना गुंडे आणि आदिवासी विकास महामंडळाच्या व्यवस्थापकीय संचालक लीना बनसोड यांच्या हस्ते ‘अदिहाट’चे उद्‍घाटन झाले.

ठक्कर बाजार आणि महामार्ग बस स्थानक तसेच नाशिक रोड रेल्वे स्थानक येथे ‘आदिहाट’ला नाशिककरांचा चांगला प्रतिसाद मिळाला आहे.

आयुक्तालयाच्या ठिकाणी मुंढेगाव आणि वाघेरा आश्रमशाळेतील विद्यार्थ्यांनी बनवलेल्या कलाकुसरीच्या वस्तू, तसेच त्र्यंबकेश्‍वर येथील आदिवासी बांधवांनी बनवलेल्या वस्तू आणि औषधे विक्रीसाठी उपलब्ध आहेत.

कलाकुसरीच्या वस्तू सर्व ठिकाणी आहेत. मात्र महामार्ग बस स्थानक आणि रेल्वे स्थानक येथे पारंपरिक धान्य उपलब्ध आहे.

आदिवासींच्या कलाकुसरीला ‘आदिहाट’मधून ग्राहक मिळून रोजगार निर्मिती होईल. लोकांनी खरेदीसाठी केलेली गर्दी बघून समाधान वाटत आहे, असे गुंडे यांनी सांगितले.

या वेळी आदिवासी अपर आयुक्त तुषार माळी, संदीप गोलाईत, उपायुक्त अविनाश चव्हाण, सुदर्शन नगरे, वित्त उपसंचालक हितेश विसपुते आदी उपस्थित होते.