बारामती : एकात्मिक फलोत्पादन (Horticulture) विकास अभियान, महाराष्ट्र राज्य औषधी व सुगंधी वनस्पती मंडळ आणि भाजीपाला गुणवत्ता केंद्र-कृषी विज्ञान केंद्र बारामती (KVK Baramati) यांच्या संयुक्त विद्यमाने तीन दिवसीय फळे व भाजीपाला निर्यात (Fruit Vegetable Export) प्रशिक्षण देण्यात आले. हे प्रशिक्षण बारामतीतील भाजीपाला गुणवत्ता केंद्रामध्ये घेण्यात आले.

९ ते ११ डिसेंबर या कालावधीत झालेल्या प्रशिक्षणासाठी नाशिक, हिंगोली, सोलापूर व लातूर विभागातून एकूण ६० प्रशिक्षणार्थींनी सहभाग घेतला होता. फळे व भाजीपाला निर्यात परवाना, फळे व भाजीपाल्यांचे विषमुक्त उत्पादन, पॅकहाउस, कोल्ड स्टोअरेज तसेच विविध देशांमध्ये भाजीपाला निर्यात करताना त्या देशांच्या अटी व नियमावली अशा विविध विषयांवर या वेळी मार्गदर्शन केले. यशवंत जगदाळे, गोविंद हांडे, तुषार जाधव या तज्ज्ञांनी मार्गदर्शन केले.

हरितगृहामधील भाजीपाला व्यवस्थापन, भाजीपाला रोपवाटिका व्यवस्थापन, फळे व भाजीपाला प्रक्रिया व भाजीपाला निर्यात या विषयांचे शेतकऱ्यांना प्रशिक्षण देण्यात आले आहेत.

तसेच येणाऱ्या दिवसांमध्ये सेंद्रिय शेती, ॲग्री बिझनेस स्टार्ट-अप व ड्रॅगनफ्रूट शेती अशा विविध विषयांवर शेतकऱ्यांना प्रशिक्षण देण्यात येणार असल्याची माहिती भाजीपाला गुणवत्ता केंद्राचे प्रमुख व प्रशिक्षण समन्वयक यशवंत जगदाळे यांनी दिली. अॅग्रीकल्चरल डेव्हलपमेंट ट्रस्टचे चेअरमन राजेंद्र पवार, मुख्य कार्यकारी अधिकारी नीलेश नलावडे, कृषी विज्ञान केंद्राचे प्रमुख डॉ. धीरज शिंदे यांचे मार्गदर्शन लाभले.