नाशिक : निफाड व सिन्नर तालुक्याला जोडणारा सीमेवर असलेल्या सोमठाणे-ब्राह्मणवाडे शिवारातील देव नदीवरील पूल पुरात (Nashik flood) वाहून गेला.(Heavy Rainfall) त्यामुळे जनजीवन विस्कळित झाले. येथील शेतकऱ्यांना काढणीस आलेल्या शेतीमालाची वाहतूक (Agricultural Transportation) करण्यास अडचणी येत आहेत;

मात्र थांबेल तो शेतकरी कसला! त्यामुळे अडचणीवर मात करण्यासाठी येथील शेतकऱ्यांनी शेतीमाल बाजारात नेण्यासाठी रिकाम्या प्लॅस्टिकच्या टाक्यांचा वापर करून व त्यावर तात्पुरता सांगाडा बनवून टोमॅटो वाहून नेत असल्याचा व्हिडिओ सोशल मीडियावर चांगलाच फिरत आहे.

सोमठाणे-ब्राह्मणवाडे गावाच्या सीमेवर शेतकऱ्यांच्या वस्त्या आहेत. या शेतकऱ्यांना वस्तीवर जाण्यासाठी देव नदीवर सिमेंट पाइप टाकून पूल बनविण्यात आला होता. मात्र देवनदीच्या पुरात हा पूल वाहून गेला आहे; मात्र पूल वाहून गेल्याने या शेतकऱ्यांना शेतीमाल नेण्यासाठी रस्ताच नव्हता.

या भागात टोमॅटो तोडे सुरू झाल्याने माल काढून पिंपळगाव बसवंत बाजार समितीत विक्रीसाठी नेला जातो. त्यामुळे शेतकऱ्यांना शेतीमाल वाहतुकीत अडथळे येत आहेत. त्यामुळे या अडचणीवर मात करत शेतकऱ्यांनी नामी पर्याय शोधला आहे. हा माल वाहून रोज दोन ते तीन पीक-अपमध्ये क्रेट भरून टोमॅटो नेला जात आहे.

महेश घुमरे, सागर डिके, सचिन आव्हाड, विठ्ठल घुमरे आदी शेतकऱ्यांनी प्लॅस्टिकच्या पाण्याचे दोनशे लिटरच्या दोन रिकाम्या टाक्या घेतल्या. त्यावर फॅब्रिकेशन करून सांगाडा तयार केला. दोन दोर बांधून हा पाळणा बांधून त्यावर टोमॅटो क्रेट वाहण्याचे काम महिनाभरापासून सुरू आहे.