Ratnagiri News : जिल्ह्यात मुसळधार पावसाचा जोर कायम असून काजळी नदीच्या पुराने रत्नागिरी तालुक्यातील हरचिरी, चांदेराई, तोणदे, पोमेंडी, सोमेश्‍वर या गावांना वेढा घातला आहे. सोमेश्‍वर गावाचा सायंकाळपर्यंत शहराशी संपर्क तुटला होता. तर किनाऱ्यावरील घरांमध्ये पाणी शिरले होते.

मुंबई-गोवा महामार्गावर निवळी घाटात दरड कोसळली आहे. अन्य तालुक्यांत राजापुरात कोदवलीला, चिपळुणात वाशिष्ठी, खेडमध्ये जगबुडी, संगमेश्‍वरात शास्त्री, सोनवी, बाव नदीला पूर आला होता. नदी किनाऱ्यावरील हजारो एकर भातशेती पाण्याखाली गेल्यामुळे शेतकरी हवालदिल झाला आहे.

जिल्ह्यात गुरुवारी (ता. २७) सकाळी ८.३० वाजेपर्यंतच्या २४ तासांत सरासरी १४४ मिमी पावसाची नोंद झाली. त्यात मंडणगडमध्ये १५१ मिमी, दापोली १३२.४०, खेड ११५.२०, गुहागर १४३.२०, चिपळूण १३२.३०, संगमेश्‍वर १५७.७०, रत्नागिरी १७७, लांजा १६९.१०, राजापुरात ११८.१० मिमी पाऊस झाला.

मुसळधार पावसाने जिल्ह्यातील प्रमुख मोठ्या नद्यांना पूर आला. किनारी भागातील गावांना दक्षतेचा इशारा देण्यात आला. राजापुरात प्रशासनाने गुरुवारी (ता. २७) शाळा बंद ठेवण्याचा निर्णय घेतला. पावसाचा सर्वाधिक फटका रत्नागिरी तालुक्याला बसला. काजळी नदीने धोक्याची पातळी ओलांडल्यामुळे सहा गावांना पुराचा फटका बसला.

सोमेश्‍वर येथील किनाऱ्यारवरील अनेक घरांत पाणी शिरल्यामुळे सोमेश्‍वरचा शहराशी संपर्क तुटला होता. गुरुवारी (ता. २७) सकाळी साडेसहाच्या सुमारास मुंबई-गोवा महामार्गावर निवळी बावनदी येथे दरड कोसळली. यामुळे महामार्गावरील वाहतूक ठप्प झाली होती. ग्रामस्थांनी दरड हटवून वाहतूक पुन्हा सुरू केली.

नद्यांना आलेल्या पुरामुळे किनारी भागातील भातशेती पाण्याखाली गेली. अनेक ठिकाणी भात लावण्या पूर्ण झाल्या आहेत. काही ठिकाणी लावणी केलेले पीकच वाहून जात आहे. संगमेश्वरातील रांगव येथील लघुपाटबंधारेच्या धरणालगत वरच्या बाजूला डोंगराला तडे गेले आहेत. चिपळूण तालुक्यातील कळवंडे धरणाला धोका निर्माण झाला आहे.