Uddhav Thackeray vs Eknath Shinde : एक वर्षा शिवसेनेत झालेल्या बंडनंतर महाराष्ट्राच्या सत्तासंघर्षावर सर्वोच्च न्यायालयाचा निकाल येण्यापूर्वी निवडणूक आयोगाने निर्णय दिला होता. त्या निर्णयाविरोधात ठाकरे गटाने सर्वोच्च न्यायालयात याचिका दाखल केली होती. त्यावर आता ३१ जुलैपासून सुनावणी होणार आहे.

उद्धव ठाकरे यांच्या नेतृत्वाखाली महाविकास आघाडीच्या विरोधात एकनाथ शिंदे यांच्यासह ४० आमदारांनी बंडखोरी केली. त्यानंतर भाजपच्या मदतीने एकनाथ शिंदे मुख्यमंत्री झाले. महाराष्ट्राच्या सत्तासंघर्षावर सर्वोच्च न्यायालयात सुनावणी सुरू असताना शिंदे यांच्या गटाकडून शिवसेना पक्षावर दावा सांगण्यात आले. त्यावर निवडणूक आयोगाने शिंदे गटाच्या बाजूने निकाल दिला. त्यानंतर उद्धव ठाकरे यांच्या पक्षाला नवं नाव आणि नवं चिन्ह निवडावे लागले.

सर्वोच्च न्यायालयाने पक्ष संघटना आणि विधीमंडळातील सदस्यांचा पक्ष या दोन गोष्टी वेगवेगळ्या असल्याचा निवाडा दिल्याने ठाकरे गटाने सर्वोच्च न्यायालयात धाव घेतली. निवडणूक आयोगाने शिवसेना पक्ष आणि निवडणूक चिन्ह धनुष्यबाणाबाबत घेतलेला निर्णय रद्द करण्याची याचिका दाखल केली आहे. या याचितेवर सर्वोच्च न्यायालय 31 जुलै रोजी या प्रकरणावर सुनावणी करणार असल्याचे सरन्यायाधीशांनी सांगितले आहे.

दुसरीकडे अजित पवार यांच्यासह राष्ट्रवादीतील आमदारांनीही बंड केले आहे. तसेच त्यांच्या गटाकडूनही राष्ट्रवादी काॅंग्रेस पक्ष आणि चिन्हावर दावा सांगण्यात आला आहे. शरद पवार आणि अजित पवार या दोन्ही गटाकडून आपलाच हक्क पक्षावर असल्याचे सांगण्यात येत आहे. दरम्यान, मुख्यमंत्री एकनाथ शिंदेसह शिवसेनेच्या १६ आमदारांना विधानसभेचे अध्यक्ष राहुल नार्वेकर यांनी नोटीस पाठवले आहे. त्यांना ७ दिवसात नोटीस देण्याची मुदत देण्यात आली आहे. शिवसेनेच्या बंडखोरांचे विधीमंडळातील सदस्यांवर अपात्रतेची टांगती तलवार आहे. त्यामुळे शिवसेना पक्ष आणि चिन्हावर सर्वोच्च न्यायालय काय निकाल देणार याकडे सर्वांचे लक्ष लागून राहिले आहे.