Amravati News नायब तहसीलदारांना राजपत्रित अधिकारी दर्जा असला तरी ग्रेड पे मात्र लागू करण्यात आलेला नाही. त्यांना राजपत्रित अधिकारी वर्ग २ चा ४८०० रुपये ग्रेड पे लागू करण्यात यावा, या मागणीसाठी तीन एप्रिलपासून तहसीलदार, नायब तहसीलदार संघटनेने बेमुदत कामबंद आंदोलन पुकारले आहे. यामुळे महसूल विभागातील (Revenue Department) कामकाज ठप्प पडण्याची शक्यता आहे.

ग्रेड पे लागू करण्यात यावा, या मागणीचे निवेदन जिल्हाधिकाऱ्यांच्या माध्यमातून शासनाला पाठविण्यात आले आहे. संघटना या मागणीसाठी वर्ष १९८८ पासून संघर्ष करीत असून सातत्याने पाठपुरावा करीत आहे.

मात्र शासनाने त्याची अद्यापही दखल घेतलेली नाही. बक्षी समितीच्या अहवालाची अंमलबजावणी करण्याचे आश्‍वासन देण्यात आले असले तरी ते पाळण्यात आलेले नाही. वारंवार आश्‍वासन पदरात पडत असून, ठोस कृती होत नसल्याने अधिकाऱ्यांमध्ये शासनाप्रती रोष निर्माण झाला आहे.

संघटनेने जिल्हाधिकाऱ्यांच्या माध्यमातून मागणीचे निवेदन शासनाला पुन्हा पाठविले असून, येत्या एप्रिलपासून बेमुदत कामबंद आंदोलन छेडण्याचा इशारा दिला आहे. हा अधिकारी वर्ग आंदोलनात सहभागी झाल्यास महसूल विभागाचे कामकाज ठप्प पडणार आहे.

जिल्हाधिकाऱ्यांना निवेदन देताना संघटनेच्या जिल्हाध्यक्ष नीता लबडे, कार्याध्यक्ष वैभव फरतारे, वैशाली पाथरे, सचिव अशोक काळीवकर, उपाध्यक्ष अरविंद माळवे, एम. टी. धुळे, राजीव वानखडे, प्रवीण देशमुख, संजय मुरतकर, नरेंद्र कुरळकर, संध्या ठाकरे, श्याम देशमुख, विनोद वानखडे, प्रशांत देशमुख, प्रशांत अडसुळे यांच्यासह जिल्ह्यातील तहसीलदार, नायब तहसीलदार उपस्थित होते.