बोर्डी, जि. पालघर ः ‘‘शेतकऱ्यांनी केलेल्या सूचनांचा नक्की विचार केला जाईल. सेंद्रिय शेतीचा (Organic Farming) प्रसार करण्यासाठी गुजरात सरकार व गुजरात नैसर्गिक व सेंद्रिय शेती कृषी विद्यापीठ (Organic Farming Agriculture University) जास्तीत जास्त प्रयत्नशील राहील,’’ अशी ग्वाही विद्यापीठाचे कुलगुरू सी. के. तिंबडिया (C. K. Timbadiya) यांनी दिली.

नैसर्गिक व सेंद्रिय शेतीचे प्रणेते भास्कर गुरुजी सावे यांच्या जन्मशताब्दीनिमित्त गुजरात राज्यातील उंबरगाव तालुक्याच्या देगरी गावातील त्यांच्या कर्मभूमीत चर्चासत्र घेण्यात आले. विद्यापीठाचे कुलगुरू टिंबडिया, निती आयोगाच्या सदस्य डॉ. मीनल पटेल, राष्ट्रीय किसान संघाचे महासचिव दिनेश कुलकर्णी, गुजरातचे अर्थमंत्री कनुभाई देसाई आदी या चर्चासत्रात सहभागी झाले.

सेंद्रिय व नैसर्गिक शेतीमध्ये भास्कर सावे यांचे योगदान जगाला मार्गदर्शक ठरणारे होते. मात्र गुजरात राज्यात त्यांच्या कामाची अद्यापही दखल घेतली गेलेली नाही, अशी खंत या वेळी शेतकऱ्यांनी व्यक्त केली. विद्यापीठाला भास्कर सावे यांचे नाव द्यावे, अशी सूचनाही या वेळी करण्यात आली. भास्कर सावे यांचे चिरंजीव सुरेश सावे व नरेश सावे यांनी कार्यक्रम यशस्वी होण्यासाठी सहकार्य केले.