Sangli News : यंदा जिल्ह्याच्या दुष्काळी टापूत अजिबात पाऊस पडत नसल्याने चिंताजनक परिस्थिती उद्‌भवल्यानंतर ताकारी उपसा सिंचन योजना सुरू करणे भाग पडले. त्यामुळे कडेगाव, खानापूर, तासगाव, पलूस आणि मिरज तालुक्यांतील लाभक्षेत्रातील शेती आणि पिण्याचे पाण्यासाठी ‘ताकारी’चे पाणी दिलासा ठरत आहे.

यंदा वळवासह मॉन्सूनच्या पावसानेही दडी मारल्याने या भागात जूनपासून पिण्याच्या पाण्याची भ्रांत निर्माण झाली होती. बरीचशी बारमाही पिके करपली आणि खरिपाच्या पेरण्या झाल्याच नाहीत. यासाठी ताकारी योजना सुरू करण्याबाबत सर्व स्तरांतून आग्रही मागणी झाल्यानंतर २३ जुलैपासून ही योजना सुरू करून लाभक्षेत्राला जगविण्याचा प्रयत्न झाला आहे.

योजनेतून पाझरणाऱ्या पाण्याने काही प्रमाणात येरळा नदीही प्रवाहित झाली असून नदीकाठच्या गावांचा पिण्याचा पाणीप्रश्न काही दिवस निकालात निघाला आहे. योजनेच्या पाण्यावर वाढलेले सिंचनक्षेत्र पाऊस नसतानाही ‘ताकारी’मुळे जिवंत राहिले आहे. सध्या योजनेचे १० पंप सुरू असून पाणी मुख्य कालव्याच्या ३० किलोमीटरच्या पुढे पोहोचले आहे.

अद्याप या परिसरांत कधीतरी रिमझिम पाऊस पडत असून अजून मोठ्या पावसाची प्रतीक्षाच आहे. त्यामुळे जमिनीतील नैसर्गिक पाणीपातळी ‘जैसे थे’ आहे. सोडण्यात आलेले पाणी किती दिवस पुरणार यानंतरचे पाणी कधी येणार, या विवंचनेत घाटमाथ्यावरील शेतकरी आहेत.