सोलापूर : ‘‘जागतिक शौचालय दिनानिमित्त (World Toilet Day) १९ नोव्हेंबर २०२२ रोजी स्वच्छ भारत अभियान (ग्रामीण) टप्पा-दोन अंतर्गत जिल्ह्यातील सर्व गावांत हागणदारीमुक्त सातत्य ठेवण्यासाठी, वैयक्तिक शौचालयाचा वापर, (Toilet Use) संत गाडगेबाबा ग्राम स्वच्छता अभियानाची विहित कालमर्यादेत कार्यवाही करण्यासाठी १९ नोव्हेंबरपर्यंत विशेष मोहीम राबविण्यात येत आहे,’’ अशी माहिती जिल्हा परिषदेचे मुख्य कार्यकारी अधिकारी दिलीप स्वामी (DIlip Swami) यांनी दिली.

स्वामी म्हणाले, ‘‘जिल्ह्यातील स्वच्छतेच्या कामास गती देऊन स्वच्छतेचा जागर करावयाचा आहे. स्वच्छ भारत अभियान (ग्रामीण) टप्पा-दोन अंतर्गत गावस्तरावर स्वच्छतेच्या विविध उद्दिष्टांच्या पूर्तीसाठी सूक्ष्म नियोजन करून कामे पूर्ण केली जातील.

मोहीम कालावधीत यापूर्वी मंजूर केलेले वैयक्तिक, सार्वजनिक शौचालय संकुलाचे बांधकाम, घनकचरा व्यवस्थापन प्रकल्प, गोबरधन प्रकल्प, प्लॅस्टिक कचरा व्यवस्थापन प्रकल्प, शोषखड्डे बांधकाम, नादुरुस्त शौचालय दुरुस्ती करणे, मैला गाळ व्यवस्थापन अशाप्रकारे सुरू असणारी सर्व कामे पूर्ण केली जातील.’’

‘‘मोहिमेदरम्यान ग्रामस्थांचा सक्रिय सहभाग घेऊन सार्वजनिक ठिकाणची स्वच्छता, एक शोषखड्डे असलेली शौचालय दोन शोषखड्डे शौचालयात रूपांतर केली जातील. याबाबत जिल्ह्यातील सर्व गट विकास अधिकारी, विस्तार अधिकारी, ग्राम विकास अधिकारी, ग्रामसेवक यांनी नियोजनपूर्वक कामे करून ही मोहीम प्रभावीपणे राबविण्याच्या सूचना दिल्या आहेत,’’ असेही स्वामी म्हणाले.