Nanded News : मंगळवारी सुरू झालेल्या पावसाने बुधवारी (ता. ५) दमदार हजेरी लावली. हा पाऊस किनवट, माहूर व हिमायतनगर तालुके वगळता इतर १३ तालुक्यांत जोरदार झाल्याने खरिपातील पेरण्यांच्या कामांना पुन्हा सुरुवात झाली आहे.

पावसामुळे लोहा व बिलोली तालुक्यातील प्रत्येक एका मंडलासह मुखेडमधील सहा मंडलात अतिवृष्टीची नोंद झाली. मागील २४ तासांत जिल्ह्यात २०.३० मिलिमीटर पाऊस झाला. विलंबाने का होईना दमदार पावसाने शेतकरी सुखावला आहे.

जिल्ह्यात दीर्घ विश्रांतीनंतर मंगळवारी पावसाने सुरुवात केली. हा पाऊस जिल्ह्यातील सर्व तालुक्यांत झाला होता. यामुळे शेतकऱ्यांनी रखडलेल्या पेरण्यांना सुरुवात केली. यानंतर बुधवारी (ता. ५) जिल्ह्यात दुपारनंतर अनेक भागांत पावसाने हजेरी लावली. किनवट, माहूर व हिमायतनगर तालुक्यांत तुरळक झाला.

इतर १३ तालुक्यांत मात्र दमदार हजेरी लावली. या पावसामुळे जिल्ह्यातील अनेक भागांत पेरण्यांच्या कामांना सुरुवात झाली. बुधवारी झालेला पाऊस मुखेड तालुक्यातील येवती मंडलात ८६ मिलिमीटर, जाहूर ८६, जांब ८४.२५, मुखेड ६६.७५, चांडोला ७१, अंबुलगा ८६, बिलोली तालुक्यातील आदमपूर ९२.७५ व लोहा तालुक्यातील मालाकोळी मंडलात ७१ मिलिमीटर पावसाची नोंद झाल्याने या आठ ठिकाणी अतिवृष्टीची नोंद झाली आहे.

यासोबतच बाऱ्हाळी ६०.८, सगरोळी ६१, दिग्रस ४६.८, लोहा ४७, कलंबर २८.५, तळणी २९, शाहापूर ५९, नरंगल ६१.३, इस्लापूर ४०.८, जलधारा ३८.८, करखेली ४३, उमरी ३४.५, सिंधी ४०.८, बरबडा ४९, माजंरम ४८.३, नायगाव २६ मिलिमीटर पावसाची नोंद झाली.

तालुकानिहाय झालेला पाऊस (मिलीमीटरमध्ये)

नांदेड १२.३०, बिलोली ४१.५०, मुखेड ७०.४०, कंधार २७.८०, लोहा ३४.१०, हदगाव ७.९०, भोकर ११.७०, देगलूर ३०.२०, किनवट १.९०, मुदखेड १२.२०, हिमायतनगर ४, माहूर ०.९०, धर्माबाद १६.४०, उमरी २४.९०,

अर्धापूर ८, नायगाव ३६.०० मिलिमिटर. चोवीस तासातील सरासरी २४.३० मिलिमीटर. आजपर्यंत जिल्ह्यात सरासरी ९५.६० मिलिमीटर वार्षिक सरासरीच्या १०.७३ टक्के पाऊस बंद झाला आहे.