Jalgaon News : सोने-चांदीच्या दरात मागील सात ते आठ दिवसांपासून चढउतार सुरूच आहेत. सोने दरात काहीशी नरमाई आली असून, दर प्रति १० ग्रॅमसाठी (प्रतितोळा) ५९ हजार ११० रुपये (जीएसटीसह) आहे.

जागतिक बाजारातील उलाढालींचा परिणाम सोने-चांदीच्या दरांवर होत आहे. यातच सोने व चांदीच्या दरात चढउतार सुरूच असून, मंगळवारी (ता. १२) सराफ बाजारात सोन्याच्या दरात काहीशी घसरण झाली. मल्टी कमोडिटी एक्सचेंजवर सोन्याचा दर प्रति १० ग्रॅमसाठी ५९ हजार रुपयांखाली होता. दुसरीकडे बुधवारी (ता. १३) चांदीच्या दरात वाढ झाली.

मंगळवारी बाजार उघडताच सोने दर १० ग्रॅममागे ५० रुपयांनी कमी झाले. चांदीच्या दरात एक किलोमागे १७० रुपयांची वाढ झाली. २२ कॅरेट सोन्याचा दर ५४ हजार १८४ रुपये प्रति १० ग्रॅम झाला. तर २४ कॅरेट सोन्याचा दर (जीएसटीसह) ५९ हजार ११० रुपये प्रति १० ग्रॅम झाला. १७० रुपयांच्या वाढीसह चांदीचा दर ७२ हजार ३० रुपये प्रति किलोवर पोहोचला.

मागील आठवड्यात सोने दरात किंचित वाढ झाली होती. त्यात मात्र घसरण झाली. मागील पंधरवड्यात सोने दर प्रति १० ग्रॅमसासाठी ५९ हजार १०० रुपये होता. अर्थात दरात मोठी वाढ मागील १५ ते २० दिवसात झालेली नाही, अशी माहिती सराफ बाजारातील सूत्रांनी दिली.

चांदी दरात मात्र मोठी वाढ मागील १५ दिवसांत झाली आहे. चांदी दरात सतत वाढ सुरू आहे. सणासुदीमुळे सोने व चांदीला मागणी सुरू आहे. पुढे मागणी आणखी वाढू शकते. परंतु ग्रामीण भागातील मागणी मात्र कमी आहे. येथील सराफ बाजारात सोने-चांदीच्या विक्रीपोटी रोज पाऊण कोटींपर्यंतची उलाढाल सध्या होत आहे. सणासुदीत किंवा नवरात्रोत्सवात ही उलाढाल वाढेल. ती प्रतिदिन एक ते सव्वा कोटी रुपयांवर पोहोचेल, असाही अंदाज आहे.