वर्धा : शहराच्या मध्यभागी प्रांजल वाघमारे यांनी सुरू केलेल्या योगिनी चॉकी सेंटरमुळे (Chocky Center ) रेशीम शेतकऱ्यांना (Silk Farmer) मोठा फायदा होणार असून शेतकऱ्यांना या सेंटरवर १० दिवसांच्या बाल्य रेशीम किटक अळ्या (Silk Worm) मिळणार आहे. त्यामुळे शेतकऱ्यांचे १० दिवस कमी होणार असून शेतकऱ्यांच्या कोष उत्पादनामध्ये (Cocoon Production) भर पडणार आहे, असे नागपूर येथील रेशीम संचालनालयाचे उपसंचालक एम. बी. ढवळे यांनी वरुड येथील योगिनी चॉकी सेंटरच्या उद्घाटन प्रसंगी मनोगत व्यक्त करताना सांगितले.

कार्यक्रमाला डॉ. कुशवा, रेशीम विकास अधिकारी पी.एस.पाडवी, ए.व्ही.वासनिक, वरिष्ठ तांत्रिक सहायक ए.एस.वाघमारे, बी.बी.खेडकर, वरिष्ठ क्षेत्र सहायक,डी.पी. भैरम, क्षेत्र सहाय्यक, प्रगतिशील शेतकरी अविनाश वाट, शिवप्रसाद लगारखाँ, भोजराज भागडे, विठ्ठल वाघमारे, विनोद चौधरी, अनंता हाडके, आनंद महाकाळकर, विवेक माहुरे, गणेश चौधरी, प्रशांत कडू, अविनाश शंभरकर, सचिन वाघमारे, विकास कावळे, संजय नेवारे उपस्थित होते. या वर्षी जिल्ह्यात १ लक्ष अंडिपुंज वाटप करण्यात येणार आहे. त्यानंतर विदर्भात लवकरच कोष मार्केट सुरू करण्यात येईल, असेही ढवळे यांनी सांगितले.

या वेळी मान्यवरांच्या हस्ते प्रगतिशील शेतकऱ्यांचा सत्कार करण्यात आला. कार्यक्रमाचे संचालन ए. एस. वाघमारे यांनी केले व आभार सुनंदा कासामपुरे यांनी मानले.त्यानंतर ढवळे यांनी जिल्हाधिकारी प्रेरणा देशभ्रतार यांची भेट घेऊन अंहिसा सिल्क या विषयावर चर्चा करून रेशीम बद्दल माहिती दिली. रेशीम उघोगाला खूप वाव असून इतर शेतीमध्ये शेतकऱ्यांचे खूप नुकसान झाले आहे. पण रेशीम शेतकऱ्यांनी एक बॅच घेऊन त्यापासून त्यांना ५० हजार ते ७० हजार एवढे उत्पन्न झालेले आहे.