Nagar News : जिल्ह्यात मागणी असलेल्या फुले संगम या सोयाबीन बियाणांचा तुटवडा निर्माण झाला आहे. त्यामुळे कृषी विभागाकडून अनुदानावर बियाणे मिळण्यासाठी परमीट मिळूनही बियाणे मिळेनासे झाले आहे. ज्यांच्याकडे हे बियाणे उपलब्ध आहे, तेथे चढ्या दराने विकले जात असल्याच्या तक्रारी आहेत. कृषी विभाग मात्र मुबलक बियाणे उपलब्ध असून ठरावीक वाणांचा शेतकऱ्यांनी आग्रह धरू नये, असे आवाहन करत आहे.

नगर जिल्ह्यात दरवर्षी साधारणपणे १५ जुलैपर्यंत बऱ्यापैकी खरिपाच्या पेरण्या आणि कापूस लागवड उरकलेली असते. यंदा पाऊस पंधरा ते वीस दिवसांनी उशिरा सुरू झाला. त्यामुळे खरिपातील सर्वच पेरण्यांना उशीर होत आहे. उशिराने पाऊस आल्यामुळे मूग, उडदाचे क्षेत्र कमी होऊन त्याजागी कापूस, सोयाबीनचा पेरा वाढणार असा अंदाज आहे.

सध्या खरिपाच्या पेरण्या सुरू आहे. नगर जिल्ह्यात खरिपाचे ५ लाख ८० हजार ५०७ हेक्टर सरासरी क्षेत्र ६ लाख ४९ हजार ७३० हेक्टर क्षेत्र कृषी विभागाने प्रस्तावीक केले आहे. सरासरीपेक्षा सत्तर हजार हेक्टर क्षेत्र जास्ती आहे. बाजरीचे क्षेत्र कमी तर कापूस, सोयाबीन, तूर, मूग, उडदाचे क्षेत्र वाढणार असल्याचा कृषी विभागाचा अंदाज आहे.

यंदा सर्वाधिक सोयाबीनचे १,५२,००० हेक्टरवर पेरणीचा अंदाज आहे. त्याअनुषंगाने कृषी विभागाने बियाणांची मागणी केलेली आहे. फुले संगम वाणाला अधिक मागणी आहे. मागणीमुळे विक्रेत्यांनी टंचाई निर्माण केल्याचा काही शेतकऱ्यांचा आरोप आहे.

सोयाबीनचे बियाणे अनुदानावर उपलब्ध करून दिले जात आहेत. त्यासाठी कृषी विभागाकडून फुले संगम बियाणांचे परमीट दिले जात असले तरी बियाणे उपलब्ध नसल्याचे दुकानदार सांगतात.