Nira Narsinhpur News : नैऋत्य मोसमी पावसाने दडी मारल्याने पिण्याचे पाणी व चाऱ्याचा प्रश्न गंभीर बनला आहे. मेंढपाळ आपल्या मेंढ्या, त्याची पिल्ले, कुटूंबातील सदस्यांच्या जेवणाचे साहित्य, पाळीव कुत्रे, कोंबड्या घोड्यांच्या पाठीवर लादून चारा व पाण्याच्या शोधात भटकंती करत फिरत असल्याची स्थिती आहे.

पावसाळा संपताच घरातील वयोवृद्ध व्यक्तींच्या जेवण, पाण्याची सोय करून मेंढपाळ कुटुंबं मेंढ्यांच्या चारा, पाण्याच्या शोधात शेकडो मैल पायपीट करत जातात.

परंतू यावर्षी पावसाने सुरूवातीपासूनच दांडी मारल्याने हजारो मैल भटकंतीवर गेलेल्या मेंढपाळ कुटूंबियांवर पुन्हा घराचा रस्ता विसरण्याची वेळ आली आहे. कारण मेंढ्या जगविण्यासाठी पुन्हा विदर्भ, मराठवाड्याकडे निघावे लागले आहे.

सध्याला घराजवळ येऊन पुन्हा घरच्यांना विसरून चारा पाण्याच्या शोधात जावे लागत असल्याने घरातील वयोवृद्ध व्यक्तींना गहिवरून आले होते.

परंतु कुटुंबियांपेक्षा मुक्या प्राण्यांचा जीव महत्त्वाचा मानून घोड्याच्या पाठीवर संसार उपयोगी साहित्य लादून ते शेकडो मैलांच्या प्रवासासाठी निघाले आहेत. सलग दुसऱ्या वर्षीची दिवाळी घरापासून दूर साजरी करण्याची वेळ मेंढपाळ कुटुंबांवर आली आहे.