सांगली ः रस्त्यावरील अपघात (Road Accident) कमी होण्याच्या व रस्ता सुरक्षिततेच्या दृष्टीने साखर कारखान्यांनी ऊस वाहतुकीसाठी (Sugarcane Transport) करार केलेल्या वाहनास व बैलगाड्यांना रिफ्लेक्टिव्ह टेप व कापडी बोर्ड छपाई करून लावण्याची मोहीम राबवावी, अशा सूचना उप प्रादेशिक परिवहन अधिकाऱ्यांनी दिल्या.

साखर कारखान्यांना ऊस वाहतूक करणाऱ्या ट्रक, ट्रॅक्टर-ट्रेलर, बैलगाड्यांना मागील बाजूस लाल, पुढे पांढरा व दोन्ही बाजूस पिवळा असा अखंड रिफ्लेक्टिव्ह टेप लावणे बंधनकारक आहे. रिफ्लेक्टिव्ह टेप नसल्यास अपघाताची शक्यता असते.

अशा वाहनांना रिफ्लेक्टर लावलेले नसल्यास वाहन मालक, चालकांवर दंडात्मक कारवाई होऊ शकते. त्यामुळे ऊस वाहतुकीच्या ट्रक, ट्रॅक्टर-ट्रेलर, बैलगाड्यांना रिफ्लेक्टिव्‍ह टेप व फलक लावण्याबाबत यापूर्वी जिल्हाधिकारी डॉ. राजा दयानिधी यांच्या अध्यक्षतेखालील बैठकीत सूचना दिल्या होत्या, त्या पाळाव्यात.