Raju Shetti : माजी खासदार राजू शेट्टी हे पंढरपूर दौऱ्यावर आहेत त्यांनी राज्य सरकारसह कारखानादारांवर सडकून टीका केली आहे. मला मिश्या यायच्या होत्या त्यावेळीपासून साखर कारखाने अडचणीत असल्याचे ऐकतोय, आता माझ्या मिश्या पांढऱ्या झाल्या तरी हेच ऐकायचे का? अशी मिश्किल टीप्पणी राजू शेट्टी यांनी केली.

उपमुख्यमंत्र्यांनी अजित पवार यांनी साखर कारखान्यांबाबत कठोर भूमिका घेतल्यावर लगेच दुसरे उपमुख्यमंत्री देवेंद्र फडणवीस यांनी पुन्हा शासनाला हमी देण्याबाबत निर्णय फिरविला सरकारच्या असल्या आडमुठे धोरणामुळे साखर कारखानदार मोठे झाले अन् शेतकरी संकटात आल्याची टीका शेट्टी यांनी केली.

ते पुढे म्हणाले की, अजित पवार यांचे खाजगी कारखाने झाल्याने त्यांना उशिरा का होईना शहाणपणा सुचले. यामुळे त्यांनी साखर कारखान्याच्या थकहमी बाबत योग्य ठाम भूमिका घेतली. कारखान्याच्या कर्जाची हमी शासनाने का घ्यावी? कारखान्यांनी पैसे बुडविले तर ते पैसे सरकारला म्हणजे जनतेला द्यावे लागतात असे सांगताना जर खाजगी कारखाने स्वतः हमीवर कर्ज घेऊन फेडतात मग यांनाच कशाला शासनाची हमी पाहिजे असेही शेट्टी म्हणाले.

या कारखानदारांना कारखाना मोडून खायचा आहे. त्यांचा हेतू स्वच्छ नाही म्हणून त्यांना वारंवार हमी द्यायची वेळ येते असा टोला राजू शेट्टी यांनी फडणवीस यांना लगावला आहे.

पंकजा मुंडेंना सरकारचा आशिर्वाद होता का?

पंकजा मुंडे यांच्या वैद्यनाथ कारखान्याची जीएसटी इतकी दिवस थकू का दिली असा सवाल करत याला सरकारचा आशीर्वाद होता का असा सवाल राजू शेट्टी यांनी केला.

यावेळी शेट्टी पुढे म्हणाले की, सध्या आम्ही राजकीय पक्षातील नेत्यांना संघटनेत प्रवेश देणे बंद केले आहे. कच्चा माल आमच्याकडे येतो प्रॉडक्ट होऊन बाहेर पडतो आणि मार्केटमध्ये विकला जातो. आमच्या संघटनेचा वापर फक्त कार्यशाळेसारखा होऊ लागल्याने आता आम्ही कच्चा माल देखील पारखून घेत असल्याची मिश्किल टिप्पणी शेट्टी यांनी केली.