अकोला ः बार्शीटाकळी तालुक्यातील मौजे पुनोती बुद्रुक येथे कृषी तंत्रज्ञान व्यवस्थापन (Agri Technology Management) यंत्रणा (आत्मा) व कृषी विभागामार्फत लिंबू हस्तबहार (Lemon Hast Bahar) शेतीशाळा घेण्यात आली. यावेळी तालुका कृषी अधिकारी विलास वाशीमकर यांनी शेतकऱ्यांना कागदी लिंबाला फेब्रुवारी ते मे महिन्यादरम्यान चांगली मागणी राहत असल्याने हस्त बहाराचे योग्य नियोजन करणे आवश्यक असल्याचे प्रतिपादन केले.

प्रकल्प संचालक (आत्मा) आरिफ शाह व जिल्हा अधीक्षक कृषी अधिकारी डॉ. मुरली इंगळे यांच्या मार्गदर्शनाखाली लिंबू हस्तबहार या विषयावर शेतीशाळा घेण्यात आली. सदर शेतीशाळेमध्ये कृषी विज्ञान केंद्रातील विषयतज्ज्ञ गजानन तुपकर यांनी पाणी व्यवस्थापन, फुलोरा अवस्थेत घ्यावयाची काळजी, खत व्यवस्थापनाविषयी मार्गदर्शन केले.

श्री. वाशीमकर यांनी पंतप्रधान उन्नयन खाद्य योजना, शेतकरी उत्पादक कंपनी स्थापन करण्याकरिता शेतकऱ्यांना मार्गदर्शन केले. आत्माच्या सहाय्यक तंत्रज्ञान व्यवस्थापक अर्चना पेटे, कृषी सहाय्यक एल. व्ही. आंधळे, प्रगतशील शेतकरी गजानन महल्ले व शेतकरी उपस्थित होते.