पुणे : किमान तापमानात (Minimum Temperature) घट झाल्याने उत्तर महाराष्ट्रासह उत्तर मराठवाड्यात गारठा (Cold Weather) कायम आहे. उर्वरित राज्यातही किमान तापमानाचा पारा काहीसा घसरला आहे. आज (ता. ४) मध्य महाराष्ट्र, मराठवाडा, विदर्भाच्या उत्तरेकडील भागात गारठा कायम राहून, किमान तापमानात चढ-उतार होण्याची शक्यता हवामान विभागाने (Weather Department) वर्तविली आहे.

मंगळवारी (ता. ३) धुळे येथील कृषी महाविद्यालयात राज्यातील नीचांकी ७.८ अंश सेल्सिअस तापमानाची नोंद झाली. तर निफाड येथील गहू संशोधन केंद्रात ८.४ अंश सेल्सिअस तापमानाची नोंद झाली आहे. जळगाव येथे ९.८, औरंगाबाद व नाशिक येथे १०.३ अंश सेल्सिअस तापमान नोंदले गेले. उर्वरित राज्यात किमान तापमानाचा पारा ११ ते २० अंशांच्या दरम्यान होता.

उन्हाचा चटका कायम असला, तरी राज्याच्या कमाल तापमानातही हळूहळू घट होत आहे. सोलापूर येथे राज्यातील उच्चांकी ३३.७ अंश सेल्सिअस तापमानाची नोंद झाली. दोन दिवस राज्याच्या किमान तापमानात चढ-उतार होण्याची शक्यता असली तरी, त्यानंतर किमान तापमानात मोठी घट होत थंडीचा कडाका वाढण्याचे संकेत आहेत.

चुरू येथे उणे ०.९ अंश तापमान

उत्तर भारतात थंडीची लाट तीव्र होत असल्याने मंगळवारी (ता. ३) राजस्थानमधील चुरू येथे पारा शून्य अंशांच्याही खाली घसरल्याने देशाच्या सपाट भूभागावरील नीचांकी उणे ०.९ अंश सेल्सिअस तापमानाची नोंद झाली.

आज (ता. ४) पंजाब, राजस्थान, हरियाना, चंडीगड, दिल्ली या राज्यांत थंडीची तीव्र लाट येण्याचा इशारा देण्यात आला आहे. हिमाचल प्रदेश उत्तर प्रदेशातही थंडीची लाट वाढण्याची शक्यता आहे. वरील राज्यात थंड दिवस अनुभवायला मिळणार आहे. उत्तर भारतासह आणि ईशान्येकडील राज्यात दाट धुक्याची स्थिती कायम राहण्याचा अंदाज आहे.

मंगळवारी (ता. ३) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) : पुणे ३२.१ (१२.५), जळगाव २९ (९.८), धुळे २८ (७.८), कोल्हापूर ३०.६ (१९.५), महाबळेश्‍वर २८.७ (१४.१), नाशिक ३०.२ (१०.६), निफाड २७.४ (८.४), सांगली ३१ (१८.१),

सातारा ३१.६ (१४.९), सोलापूर ३३.७ (२०.१), सांताक्रूझ ३२.४ (१६.६), डहाणू २८.३ (१६), रत्नागिरी ३१.७ (१९.१), औरंगाबाद ३० (१०.६), नांदेड ३०.८ (१७.८), उस्मानाबाद - (१५), परभणी ३०.७ (१७), अकोला ३०.८ (१४.९), अमरावती ३१ (१४.३), बुलडाणा २९ (१४.५), ब्रह्मपुरी २९.८ (१५.२), चंद्रपूर २८.२ (१७.४), गडचिरोली २९ (१३), गोंदिया २८ (१२.१), नागपूर २८.४ (१३.२), वर्धा २८.२(१४.५), यवतमाळ २८.५ (१६.०).