Yavatmal News : गेल्या महिन्यात अनेक भागांत बोंड अळी आढळून आली होती. यानंतर विभागीय कृषी संशोधन केंद्रातर्फे सर्वेक्षण करण्यात आले आहे. यात बोंड अळीचे प्रमाण आर्थिक नुकसान पातळीच्या खाली असल्याचे दिसून आले असून, बोंड अळीचा प्रादुर्भाव अत्यंत कमी झाल्याचे दिसून आले.

जुलै महिन्यातील अतिवृष्टीनंतर ऑगस्ट महिन्यात पावसाचा खंड पडला होता. या काळात पिकाची वाढ होत असल्याने पाऊस अत्यंत गरजेचा होता. अशातच जिल्ह्यातील काही भागात कपाशीवर गुलाबी बोंड अळी दिसून आली. कृषी विभाग तसेच कृषी संशोधन केंद्राकडे अनेक भागांतून शेतकऱ्यांच्या तक्रारी आल्या होत्या.

यानंतर विभागीय कृषी संशोधन केंद्रातर्फे ऑगस्ट आणि सप्टेंबर महिन्यांत रोव्हिंग सर्वेक्षण करण्यात आले. यात बोंड अळीची स्थिती तसेच तिचे प्रमाण यांची माहिती घेण्यात आली. या सर्वेक्षणात शेतकऱ्यांना दिलासा देणारी बाब समोर आली आहे. बोंड अळी असली तरी तिचे प्रमाण अत्यंत कमी झाल्याचे आढळून आले.

बोंड अळी दिसल्याने शेतकऱ्यांमध्ये भीतीचे वातावरण निर्माण झाले होते. उत्पादनात घट येईल अशी चिंता शेतकऱ्यांना होती. सर्वेक्षणात सध्या तरी दिलासादायक चित्र पुढे आले आहे. बोंड अळीचे अस्तित्व असले तरी तिचे प्रमाण, आर्थिक नुकसान पातळीच्या कमी दिसून आले आहे.