Nashik News : ‘‘राज्य सरकारने कांद्याला अनुदान जाहीर केलेले आहे. मात्र ते दिलेले नाही. मी मंत्री असताना त्या काळातही कांद्याला अनुदान दिले होते. त्या वेळी कामात गती होती. सरकारने अनुदान देण्यासाठी लक्ष दिले पाहिजे.

अन्यथा सरकार विरोधात आंदोलन करू. सरकारसोबत असलो म्हणजे असे नाही, की आम्ही काही करणार नाही. शेतकऱ्यांचे प्रश्‍न आमच्या दृष्टीने महत्त्वाचे आहेत,’’ अशी भूमिका माजी राज्यमंत्री सदाभाऊ खोत यांनी मांडली.

गुरुवारी (ता. ६) खोत हे नाशिक जिल्हा दौऱ्यावर होते. या वेळी त्यांनी शासकीय विश्रामगृह येथे पत्रकारांशी संवाद साधला. रयत क्रांती संघटनेचे प्रदेशाध्यक्ष दीपक पवार, माजी प्रदेशाध्यक्ष शिवनाथ जाधव, कार्यकारी अध्यक्ष दीपक भोसले, जिल्हाध्यक्ष वाल्मीक सांगळे उपस्थित होते.

खोत म्हणाले, ‘‘मुख्यमंत्री स्वतःच्या शेतावर जातात. काम करतात. त्याप्रमाणे मुख्यमंत्र्यांनी राज्यातील शेतकऱ्यांच्या शेतावर यावं. त्यांच्याबरोबरही काम करून बघावं. त्यांचे कष्ट पाहावे, तेव्हाच शेतकऱ्यांच्या शेतातील प्रश्‍न समजतील.’’

‘‘दोन साखर कारखान्यांमधील हवाई अंतर कमी करण्यासाठी मुख्यमंत्र्यांनी समिती स्थापन केली. मात्र ही समिती म्हणजे कोपऱ्याला गूळ लावण्याचा प्रकार आहे. तो गूळ खाताही येत नाही आणि चाटताही येत नाही. मग काय फायदा? मुख्यमंत्र्यांनी स्थापन केलेली ती समिती बकवास आहे,’’ अशी टीका त्यांनी केली.