अॅग्रोवन वृत्तसेवा

Khandesh Onion Cultivation : जळगाव ः खानदेशात कांदा लागवडीची तयारी सुरू झाली आहे. धुळ्यातील काही भागात लागवड सुरूदेखील झाली आहे. यंदा लागवड १० हजार हेक्टरवर स्थिर राहील, असा अंदाज आहे.

धुळ्यात साडेपाच ते सहा हजार हेक्टरवर लागवड होईल. नंदुरबार ६०० ते ७०० हेक्टरवर आणि जळगाव जिल्ह्यात साडेतीन ते चार हजार हेक्टरवर कांदा लागवड अपेक्षित आहे. खरिपातील लागवड धुळ्यात घटणार नाही किंवा वाढणारदेखील नाही. या भागात दरवर्षी लागवड स्थिर असते. जळगाव जिल्ह्यात काही वेळेस लागवड कमी होते किंवा लागवडीत वाढ होते. परंतु मागील दीड ते दोन वर्षांपासून कांद्याला हवे तसे दर नसल्याने शेतकरी लागवड वाढविणार नाहीत, असे दिसत आहे.

लागवडीसंबंधी धुळे व जळगाव जिल्ह्यात मिळून सुमारे ३०० हेक्टरवर रोपवाटिका आहेत. त्यामधील कांदारोपांची स्थिती चांगली आहे. अतिजोरदार किंवा सततचा पाऊस अशी स्थिती नाही. यामुळे रोपांची मरतुक कमी आहे. तसेच वाढही बऱ्यापैकी आहे. कांदा रोपवाटिका धुळ्यातील साक्री, धुळे, शिंदखेडा भागात अधिक आहे. जळगावात चोपडा तालुक्यातील धानोरा, अडावद, मराठे, लासूर, यावलमधील किनगाव, डांभुर्णी, साकळी, धरणगावमधील पथराड, वंजारी, एरंडोलातील खर्ची आदी भागात रोपवाटिका आहेत.

खुले बियाणे खरेदीस पसंती

धुळे जिल्ह्यात काही शेतकऱ्यांनी आगाप लागवड सुरू केली आहे. जळगाव जिल्ह्यातील अनेक शेतकऱ्यांनी करार शेती पद्धतीने लागवडीलाही पसंती दिली आहे. कांद्याला दर कमी आहेत. परंतु बाजारात बियाणे अव्वाच्या सव्वा दरात मिळत आहे. १०००, १२००, १५००, २००० रुपये प्रतिकिलो या दरात बाजारात बियाणे आहे. यामुळे शेतकऱ्यांचा उत्पादन खर्च वाढतच आहे. बाजारात बियाणे महाग असल्याने अनेकांनी पॅकिंगशिवाय असलेल्या खुल्या बियाण्याची खरेदी गावोगावी शेतकऱ्यांकडून करण्यास पसंती दिली आहे.