Solapur Onion News : कांद्यावरील निर्यातशुल्क ४० टक्क्यांपर्यंत वाढविण्यात आले आहे, ही शुल्कवाढ तातडीने रद्द करावी, या मागणीसाठी जनहित शेतकरी संघटनेचे अध्यक्ष प्रभाकर देशमुख यांच्या नेतृत्वाखाली बुधवारी (ता. २३) सोलापूर कृषी उत्पन्न बाजार समितीमध्ये कांद्याचे लिलाव बंद पाडण्याचा प्रयत्न करण्यात आला.

तसेच केंद्र सरकारविरोधात जोरदार घोषणाबाजी करत सरकारचा निषेध करण्यात आला. दरम्यान, ही शुल्कवाढ मागे घेतली नाही, तर कृषिमंत्री धनंजय मुंडे यांच्या निवासस्थानासमोर आंदोलन करू, असा इशारा या वेळी देशमुख यांनी दिला.

आज सकाळपासूनच या आंदोलनासाठी कार्यकर्ते हैदराबाद रस्त्यावरील बाजार समितीच्या परिसरात जमू लागले होते. तसेच या आंदोलनाच्या पार्श्‍वभूमीवर पोलिसांनीही मोठा बंदोबस्त लावला होता. सकाळी दहाच्या सुमारास कांद्याचे लिलाव सुरू होतात.

ते बंद पाडण्याच्या उद्देशाने संघटनेने हे आंदोलन या ठिकाणी पुकारले होते. त्यानुसार सकाळी जनहित संघटनेचे कार्यकर्ते देशमुख यांच्यासह थेट कांदा सेलहॅालमध्ये गेले आणि तिथे सरकारविरोधात मोठ्याने घोषणाबाजी करत कांद्यावरील निर्यातशुल्कवाढ तातडीने मागे घ्या, अशी मागणी करत निदर्शने सुरू केली. त्या आधी येथे कांदा घेऊन आलेल्या शेतकऱ्यांशीही कार्यकर्ते बोलून त्यांना आपली भूमिका समजावून सांगत होते. पण आंदोलन सुरू होताच, शेतकऱ्यांची वाढती संख्या पाहून, पोलिसांनी कार्यकर्त्यांना लगेच ताब्यात घेतले.