सोलापूर : कोविडमुळे (Covid) एक किंवा दोन्ही पालक गमावलेला एकही बालक मदतीपासून (Covid Compensation) वंचित राहू नये, यासाठी संबंधित सर्व यंत्रणांनी परस्पर समन्वयाने कार्यवाही करावी, अशा सूचना निवासी उपजिल्हाधिकारी शमा पवार यांनी येथे दिल्या. कोविड १९ मुळे एक किंवा दोन्ही पालक गमावलेल्या बालकांच्या काळजी व संरक्षणासाठी स्थापन करण्यात आलेल्या जिल्हास्तरीय कृती दलाच्या आढावा बैठकीत त्या बोलत होत्या.

या बैठकीस तहसीलदार अंजली मरोड, जिल्हा महिला व बालविकास अधिकारी डॉ. विजय खोमणे, जिल्हा बाल संरक्षण अधिकारी अतुल वाघमारे, परिविक्षा अधिकारी नितीन इरकल, युनिसेफचे जिल्हा समन्वयक विकास कांबळे आदी उपस्थित होते.

श्रीमती पवार म्हणाल्या, मिशन वात्सल्य अंतर्गत शिधा पत्रिका, वारस प्रमाणपत्र, संजय गांधी निराधार योजना, राष्ट्रीय कुटुंब लाभ योजना आदि योजनांचा लाभ देताना येणाऱ्या अडचणींचे निराकरण संबंधित यंत्रणांनी परस्पर समन्वयाने करावे, यासाठी महसूल विभाग व विधी सेवा प्राधिकरणची आवश्यकतेनुसार मदत घ्यावी. तसेच, निराधार, विधवा महिलांना व्यावसायिक प्रशिक्षण देण्यासाठी कार्यावाही करावी, असे त्या म्हणाल्या.

यावेळी पी. एम. केअर फॉर चिल्ड्रेन योजना, राज्य शासकीय योजना, रस्त्यावरील मुलांचा विषय, बाल न्याय निधी, मिशन वात्सल्य आदी योजनांच्या कार्यवाहीचा आढावा घेण्यात आला. या वेळी संरक्षण अधिकारी यांनी बालकांना मदत मिळवून देण्यामध्ये चांगले काम केल्याबद्दल त्यांचे अभिनंदन करण्यात आले

पालक गमावलेल्या बालकांना मदत

जिल्हा महिला व बालविकास अधिकारी डॉ. विजय खोमणे यांनी यासंदर्भातील विविध योजनांच्या कार्यवाहीची माहिती दिली. ते म्हणाले, कोविड १९ मुळे दोन्ही किंवा एक पालक गमावलेल्या बालकांची संख्या एक हजार १५२ आहे. पी.एम.केअर फॉर चिल्ड्रेन योजनेंतर्गत ऑनलाइन नोंदणी केलेल्या सर्व ४१ लाभार्थींच्या पोस्ट खात्यावर प्रत्येकी १० लाख रुपये जमा केले आहेत. दोन्ही पालक गमावलेल्या ४३ बालकांना मागील आठ महिन्यांचे तर एक पालक गमावलेल्या एक हजार १०९ बालकांना मागील सहा महिन्यांचे प्रत्येकी ११०० रुपये प्रतिमाहप्रमाणे डीबीटीद्वारे अनुदान वितरित करण्यात आल्याची माहिती त्यांनी दिली.