Beed News : परळी येथील वैद्यनाथ साखर कारखान्याने १९ कोटी रुपयांचा कर चुकवला नाही. त्यामुळे जीएसटी विभागाने नोटीस बजावत जप्ती कारवाईचा इशारा दिला आहे. हा भाजपच्या नेत्या पंकजा मुंडे यांच्यासाठी मोठा धक्का मानला जात आहे. अशात पंकजा मुंडे यांच्या मदतीला मुंडे समर्थक सरसावले असून पाथर्डी तालुक्यातील समर्थकांनी लोकवर्गणी जमा करण्यास सुरुवात केली आहे.

१९ कोटी रुपयांचा कर चुकवल्याने जीएसटी आयुक्तालयाने वैद्यनाथ सहकारी साखर कारखान्यावर जप्तीची कारवाई करण्याचे नोटीस पाठवले आहे. त्यामुळे पंकजा मुंडे अडचणीत आल्या आहेत. त्यांच्या मदतीसाठी कृषिमंत्री धनंजय मुंडेही धावून आल्याची चर्चा आहे.

कारखान्यावरील कारवाईमुळे पंकजा मुंडे नाराज झाल्या असून कारवाईपासून वाचण्यासाठी त्यांची धावपळ सुरू आहेत. अशा परिस्थितीमध्ये मुंडे समर्थक मदतीला धावून आले आहेत. अहमदनगर जिल्ह्याच्या पाथर्डी तालुक्यातील अनेक समर्थक सोशल मिडियाच्या माध्यमातून आर्थिक मदतीच्या रकमांची घोषणा करत आहेत.

मुंडे समर्थक सोशल मिडियावर विविध रकमांचे धनादेश 'गोपीनाथ मुंडे प्रतिष्ठान'च्या नावाने पोस्ट करत पाठिंबा देत आहेत. ही रक्कम पकंजा मुंडे यांच्याकडे दसरा मेळाव्यात सुपूर्त करण्यात येणार आहेत.

वैद्यनाथ सहकारी साखर कारखान्याची उभारणी भाजपचे दिवंगत नेते गोपीनाथ मुंडे यांनी केली. या कारखान्याने अल्पावधीतच मराठवाड्यातील सर्वाधिक उसाचे गाळप करण्याचा विक्रम केला. तसेच राज्यभरातील अडचणीत सापडलेले वीस सहकारी साखर कारखाने चालवण्याची तयारी दाखवली होती. परंतु गोपीनाथ मुंडे यांच्या निधनानंतर कारखाना अडचणीत सापडला.