Weather Forecast Maharashtra : राज्यात पुढचे दोन दिवस पावसाची शक्यता आहे. तर विदर्भातील काही जिल्ह्यांमध्ये आज (ता.०२) आणि उद्या पावसाचा यलो अलर्ट देण्यात आला आहे. हवामान खात्याच्या माहितीनुसार गडचिरोली, गोंदिया, भंडरा, चंद्रपूर, वर्धा, यवतमाळ, अकोला, नागपूर, अमरावती, बुलढाणा या जिल्ह्यांना पावसाचा अलर्ट देण्यात आला आहे.

मराठवाड्यात लातूर, नांदेड, उस्मानाबाद या जिल्ह्यांमध्येही यलो अलर्ट आहे. तर पश्चिम महाराष्ट्रातील सोलापूर, सांगली, सातारा या जिल्ह्यांनाही पावसाचा यलो अलर्ट दिला आहे. कालपासून पुणे आणि मुंबईत पाऊस सुरु झाल्याने वातावरणात गारवा निर्माण झाला आहे.

दरम्यान मागच्या काही दिवसांपासून गायब झालेल्या पावसाने राज्यातील अनेक जिल्ह्यात सुरूवात केली. पुणे जिल्ह्यातील घाट माथ्यासह अनेक ठिकाणी हलक्या ते मध्यम पावसाच्या सरी बरसल्या. आज शनिवारी पहाटेपासूनच पुणे शहरासह पिंपरी चिंचवड आणि ग्रामीण भागात पावसाला सुरुवात झाली आहे.

महिनाभराच्या कालावधीनंतर आज पुन्हा पाऊस झाल्याने शेतकऱ्यांसह सर्वच स्तरातून समाधान व्यक्त करण्यात आले आहे. दरम्यान हवामान खात्याकडून देण्यात आलेल्या माहितीनुसार, बंगालच्या उपसगरात कमी दाबाचा पट्टा निर्माण झाल्याने मान्सून पुन्हा एकदा सक्रिय झाला आहे. त्यामुळे आगामी ४८ तास पावसाचा जोर राहणार आहे.

काल रात्रीपासून पुणे जिल्ह्यात पावसाला सुरूवात झाली. पुणेकरांची पहाट उजाडली ती पावसानेच, पहाटे सहाला सुरू झालेला पाऊस सकाळी ११.३० पर्यंत सुरूच होता. पुणे शहरातील बिबवेवाडी, कोथरुड, पेठ परिसर, एनआयबीएम, शिवाजीनगर, हडपसर या भागात मुसळधार पाऊस झाला. तसेच पिंपरी चिंचवडमधील मोशी आणि मावळ तालुक्यातही मुसळधार पावसाची नोंद आहे.

कोकणातील काही भागात पाऊस

मागील १५ दिवसांपासून विश्रांती घेतलेल्या पावसाचे रत्नागिरीमध्ये जोरदार आगमन झाले. पावसाअभावी भात शेती संकटात सापडली होती. तर नाचणीसह अन्य पिकांना धोका निर्माण झाला होता. पुढचे दोन दिवस असाच पाऊस असल्याने शेतकऱ्यांमधून समाधान व्यक्त करण्यात येत आहे.