Milk Producer Farmers : दूध खरेदी विक्रीसाठी अनिवार्य केलेल्या इलेक्ट्रीक तोलन उपकरणांच्या वापराबाबत तक्रारदार दूध उत्पादक शेतकरी व विभागाच्या अधिकाऱ्यांसमवेत बैठक घेऊन निर्णय घेण्यात येणार असल्याची माहितीत अन्न व नागरी पुरवठा आणि ग्राहक संरक्षण मंत्री छगन भुजबळ यांनी दिली. दरम्यान कोल्हापूर जिल्हा संभाजी ब्रिगेडने यावर आवाज उठवला होता. यावर मंत्री भुजबळ यांनी बैठक घेण्यात येणार असल्याची माहिती दिली आहे.

दूध संकलन केंद्रांवर दूध मापनासाठी १० ग्रॅम अचूकतेचे इलेक्ट्रिक तोलन उपकरणांचा वापर अनिवार्य करण्यात आला आहे. मात्र, १० ग्रॅम अचूकतेचे इलेक्ट्रिक तोलन उपकरण वापरात दूध उत्पादक आणि दूध विक्री करणाऱ्या संस्थांना अडचणी येत आहेत. यात दूध उत्पादकांचा तोटा होत आहे. यावर तोडगा काढण्यासाठी अन्न व नागरी पुरवठा आणि ग्राहक संरक्षण मंत्री भुजबळ यांच्या अध्यक्षतेखाली कोल्हापूर जिल्हा सहकारी दूध संस्था कर्मचारी संघटना यांच्यासमवेत आज बैठक घेण्यात आली.

या बैठकीला वैद्यकीय शिक्षण मंत्री हसन मुश्रीफ, वैध मापन शास्त्र विभागाचे नियंत्रक डॉ. सुरेश मेकला, विलास पवार, कोल्हापूर जिल्हा सहकारी दूध संस्था कर्मचारी संघटनेचे प्रतिनिधी दयानंद पाटील, केरबा पाटील, श्यामराव पाटील, विश्वास पाटील, संजय पाणारी उपस्थित होते.

दहा ग्रॅम वजन काट्यावर वजन घेत असताना काटा स्थिर होण्यास वेळ लागतो. पर्यायाने दूध संकलनास वेळ लागत असल्यामुळे संघाने ठरवून दिलेल्या वेळेत दूध संकलन होत नाही. सोबतच दुधाच्या गुणावर परिणाम होऊन संस्थेचा व पर्यायाने दूध उत्पादकांचाही तोटा होत आहे.

वजन काटा वेळेत स्थिर होत नसल्याने दूध उत्पादक आणि संस्थेच्या कर्मचाऱ्यांमध्ये वादाचे प्रसंग उद्भवू शकतात. त्यामुळे सध्याचा इलेक्टिक तोलन उपकरण वापरण्याची सक्ती रद्द करण्याची मागणी यावेळी कोल्हापूर जिल्हा सहकारी दूध संस्था कर्मचारी संघटना यांनी केली. यावर मंत्री भुजबळ यांनी संयुक्त बैठक घेऊन सविस्तर चर्चेअंती निर्णय घेण्यात येईल, असे सांगितले.

संभाजी ब्रिगेडची मोहीम

कोल्हापूर जिल्ह्यातील सहकारी दूध संस्थांमध्ये दूध संकलन करताना फॅटसाठी म्हणून बरेच दूध काढून घेतले जात होते. यावर मागच्या काही महिन्यांपूर्वी संभाजी ब्रिगेडकडून जोरदार मोहीम राबवत दुधाची लूट रोखली होती. दरम्यान सहकारी दूध संकलन केंद्रांत दूध वजनात १० ग्रॅमपर्यंत अचुकता यावी, यासाठी प्रत्येक दूध संस्थेत तोलन उपकरण वापर बंधनकारक करण्यात आले.

याबाबतचे कोल्हापूर वैधमापनशास्त्र विभागाकडून असे आदेशही काढण्यात आले होते. पण जिल्ह्यातील दूध संस्थांमध्ये शासकीय आदेश धाब्यावर बसवत १०० ग्रॅम दूध घेऊन शेतकऱ्यांची लूट केली जात असल्याचा प्रकार संभाजी ब्रिगेडचे जिल्हा अध्यक्ष रुपेश पाटील यांनी समोर आणला होता.