नाशिक : मालेगाव शहरालगत असलेल्या द्याने शिवारातील यंत्रमाग कारखान्यांना आग (Power Loom Factory Fire) लागल्याने भीषण अग्नितांडव पाहायला मिळाले. आग लागल्याची दुर्घटना शनिवारी (ता.५) पहाटेच्या सुमारास घडली. या आगीमध्ये यंत्रमाग कारखानदारांचे (Power Loom Factory) लाखोंचे नुकसान झाल्याचे समोर आले आहे. ४ ते ५ कारखान्यांचे मोठे नुकसान झाले आहे.

परिसरातील प्लॅस्टिक कारखान्याला आग लागली. त्यानंतर ही आग मोठ्या प्रमाणात वाढल्याने लगतच्या यंत्रमाग कारखान्यांपर्यंत भडका वाढत गेला. त्यामध्ये कच्चामाल सूत, तयार कपड्याचे नुकसान मोठ्या प्रमाणावर झाले आहे.

यामध्ये अनेक यंत्रमाग जळून खाक झाले. यंत्रमाग व्यावसायिक श्रावण वेताळ यांचे नुकसान असल्याचे समजते. आगीचे कारण अद्याप स्पष्ट झालेले नाही. आगीच्या दुर्घटनेची माहिती मिळताच पालकमंत्री दादा भुसे यांनी घटनास्थळी धाव घेतली. आगीत अनेक कारखान्यांचे नुकसान झालेले आहे. या दुर्घटनेत आर्थिक नुकसान मोठे झालेले आहे, मात्र सुदैवाने कुठलीही जीवितहानी झालेली नसल्याचे समजते.