ॲग्रोवन वृत्तसेवा
Vasmat : हिंगोली : ‘‘वसमत तालुक्यातील भेडेंगाव शिवारातील जुनोना येथे भव्य ड्रायपोर्ट कम ‘लॉजिस्टिक पार्क’ उभारले जाणार आहे. त्याबाबत केंद्रीय रस्ते परिवहन विभाग आणि राजमार्ग मंत्रालयातर्फे पत्राद्वारे कळविण्यात आले आहे,’’ अशी माहिती खासदार हेमंत पाटील यांनी दिली.

पाटील म्हणाले, ‘‘या प्रकल्पामुळे हजारो तरुण कुशल, अर्धकुशल आणि उच्चशिक्षित तरुणाईला रोजगाराच्या नव्या संधी उपलब्ध होतील. शिवाय, शेतकऱ्यांनी उत्पादित केलेल्या मालास एका जागेवरून दुसऱ्या जागेवर अगदी सहजपणे नेता येईल. त्यांच्या मालास योग्य असा मोबदला देखील मिळेल. त्यामुळे शेतकऱ्यांचे जीवनमान उंचावण्यास मदत होणार आहे.’’

‘होलसेल मॉल चेन होणार तयार’
‘‘‘लॉजिस्टिक पार्क’मध्ये फ्रेट स्टेशन, साठवणूक, वितरण, उत्पादनांचे ग्रेडिंग, कार्गो अशा सुविधा दिल्या जाणार आहेत. मोठ्या कंपन्यांची उत्पादने ठेवण्यासाठी या पार्कचा उपयोग होतो. ‘लॉजिस्टिक हब’मध्ये ट्रक टर्मिनल्स, कुलिंग, प्लॅन्ट, वर्कशॉप, होलसेल मॉल चेन तयार केली जाईल,’’ असे पाटील यांनी सांगितले.