Sindhudurg Rain News : जिल्ह्यात मुसळधार पाऊस सुरू आहे. नदी-नाल्यांच्या पाणीपातळीत प्रचंड वाढ झाली आहे. जिकडे तिकडे पाणीच पाणी असल्याचे चित्र आहे. जिल्ह्यातील देवगड, वेंगुर्ला आणि मालवण तालुक्यांना पावसाने अक्षरक्ष झोडपून काढले आहे.

शेतमळ्यांमध्ये देखील मोठ्या प्रमाणात पाणी साचलेले दिसून येत आहे. दरम्यान, पावसाचा जोर कायम राहिल्यास पूरस्थिती निर्माण होण्याची शक्यता आहे. दरम्यान देवगड तालुक्यात सर्वाधिक १८८ मिलिमिटर पावसाची नोंद झाली आहे.

जिल्ह्याच्या काही भागांत मंगळवारी (ता. ४) जोरदार पाऊस झाला. तर काही भागांत मध्यम स्वरूपाचा पाऊस सुरू होता. मात्र बुधवारी (ता. ५) पहाटेपासून जिल्ह्याच्या सर्वच भागांत मुसळधार पावसाला सुरुवात झाली आहे. पावसाच्या सरीवर सरी कोसळत आहेत. पावसामुळे शेतमळे तुडुंब भरून वाहत आहेत.

नदी-नाल्यांच्या पाणीपातळीत प्रचंड वाढ झाली आहे. जिल्ह्यातील गडनदी, जानवली, कर्ली, तिलारी, शुकनदी या नद्यांच्या पाणीपातळीत मोठी वाढ होत आहे. त्यामुळे पावसाचा जोर असाच राहिल्यास जिल्ह्यात पूरस्थिती निर्माण होण्याची शक्यता आहे.

पाणथळ जमिनीतील भातरोपे पुनर्लागवड थांबवून शेतकऱ्यांनी वरकस जमिनीतील लागवडीला सुरुवात केली आहे. दुपारी उशिरापर्यंत जिल्ह्याच्या सर्वच भागांत मुसळधार पाऊस सुरू होता.

जिल्ह्यातील देवगड, मालवण आणि वेंगुर्ला या किनारपट्टीच्या तालुक्यांमध्ये पावसाचा जोर अधिक राहिला आहे. तीन तालुक्यांमध्ये १०० मिलिमिटरपेक्षा अधिक पावसाची नोंद झाली आहे.

तालुकानिहाय पाऊस (मिलिमीटरमध्ये) : देवगड-१८८ , मालवण -१२२.४, सावंतवाडी- ७७.१, वेंगुर्ला -१०५.२, कणकवली - ६१.२, कुडाळ-९०.५, वैभववाडी-५५.३, दोडामार्ग -५५.९.